RCLM Baucau (10/06/2026)—Nonu Governu Konstitusional liu husi Sekretariu Estadu Protesaun Sivil distribui material rekoperasaun no apoio orsamentu hamutuk, rihun atus ida rua nolu resin ualu, atus ida lima nolu dolares amerikanu ba vitima dezastre naturais, hamutuk nain 185 iha Munisipiu Baucau husi tinan 2024 no tinan 2025.
Sekretario Estadu Protesaun Civil hateten, bazeia ba dektreitu lei numeru 7/2021, fo kompetensia delegasaun ba governu no liu husi sekretariu estadu protesaun civil, atu fo asistensia, emergensia no rekoperasaun ba vitima dezastre naturais sira iha Timor Leste, hodi rekopera fila fali uma sira ne’ebe hetan estragus, tamba Vitima sira iha direitu atu hetan.
Sekretariu Estadu Protesaun Civil hatutan, husu ba vitima sira labele halo konstrusaun iha area risku hanesan Foho lolon, mota ninin, risku rai hala’i atu nune’e labele vitima ba bebeik, no husu mos atu labele faan material sira no fo empresta ba ema seluk.
“Husu vitima sira labele halo uma iha fatin risku, maibe halo uma dook husi fatin risku no labele faan material, se faan ne’e krime, tamba ne’e kuidadu material sira, hodi hari’i fali uma foun ne’ebe dignu hanesan mos ho komunidade sira seluk”. Dehan Domingos Reis ba jornalista sira depois fahe material iha Autoridade Munisipiu Tersa, 10/06/2026.
Entertantu Vitima Dezastre Naturais husi suku Libagua Ercia Fatima Jose da Costa hateten, sente kontente no agradese ba Governu tamba fo apoio material rekoperasaun, hodi bele rekopera fali uma ne’ebe hetan estragus husi anin.
“Ha’u sente kontente no agradese ba Governu, tamba bele apoio ona material uma nian ba ami, hodi ami bele halo fila fali ami nia uma ne’ebe anin estraga”. Hatete Ercia
Material rekoperasaun ne’ebe Governu apoio ba vitima sira mak hanesan Osan, kalen, Besi, Pregu, Sementi, no material kontrusaun seluk.
Ekipa Kobertura : RCLM Baucau
