RCLM-Baucau (31/07/2026)—Implementasaun Programa Nasionál Dezenvolvimentu Suku (PNDS) regular tinan 2026 iha Suku Ostico, Postu Administrativu Vemasse, Munisípiu Baucau, ne’ebé prioriza konstrusaun Sentru Atendimentu Administrasaun Suku, agora dadaun atinje ona progresu 60%.
Xefe Suku Ostico, Policarpo da Silva, esplika prioridade PNDS tinan ida-ne’e konstrui sentru atendimentu administrasaun suku, proposta ne’e hetan aprovasaun iha Reuniaun Asembleia Postu Administrativu (ASPA) no mós Konsellu Konsultivu Munisipál (KKM), Implementasaun obra hahú iha fulan Juñu no agora dadaun projeitu fiziku tama ona ba faze taka kalen.
“Ostico ami laiha ofice atendementu publiku nian,entaun tinan ida ne’e ami halo sentru atendementu administrasaun suku no lansamentu ami halo fulan ida ba kotuk, depois to’o agora ninia atinjimentu 60% iha ona orsida ami taka ona kalen, depois kontinua taka plafon hela semana rua parese terminia nia obra fiziku sira,” hateten xefe suku Ostico ba RCLM iha salaun “Soi-Mali” Autoridade Munisipal vila nova Baucau kinta (30/07/2026).
Policarpo hatutan, konstrusaun edifísiu foun ne’e ho medida 14×6 metru, no bainhira remata sei utiliza husi Xefe Suku, Xefe Aldeia sira, funsionáriu suku na’in-4, Ofisiál Polísia Komunitária (OPS), no mós rai ekipamentu no lojístika.
“Sala enkontru ida, kuartu ida ba polisia (OPS), kuartuda ida tau armariu no kadeira sira, funsionariu na’in-4 ketak, xefe suku ketak no xefe aldeia sira nia ketak,” akresenta Policarpo.
Orsamentu ne’ebé alokadu husi PNDS iha Suku Ostico hamutuk US $ 30.743, ho durasaun implementasaun fulan haat.
Suku Ostico kompostu husi aldeia tolu, mak hanesan aldeia Bahamori, Haunau no Ostico, ho total uma-kain 584 no populasaun hamutuk ema 2.400.
Ekipa Kobertura : RCLM
