RCLM Baucau (28/07/2026)—Projeitu kanalizasaun bee moos husi Suku Defawasi ne’ebe kanaliza ba iha Postu Baguia Vila Munisipiu Baucau, hahu husi loron 4 fulan abril tinan 2023 to’o mai agora, Kompaña rua mak troka malu ona maibe projeitu refere Seidauk Finaliza.
Xefe Suku Defawasi Salustiano Ximenes Guterres hateten, prosesu konstrusaun dada bee moos ne’ebe trade parte autoridade suku relata ona ba iha Parlamentu Nasional, no Ministeriu Relevante sira, maibe to’o agora konstrusaun seidauk remata.
Relasiona projeitu ne’ebe tarde, parte autoridade suku konsidera komunidade barak mak hein hela bee refere, no fo impaktu ba orsamentu jeral estadu.
“Ita konsidera katak komunidade barak mak hein hela bee mos atu asesu, maibe hein hein to’o tempu agora seidauk finaliza ne’e no fo mos impaktu ba ita nia orsamentu jeral do estadu nian”. Dehan Xefe suku Defawasi ba jornalista RCLM hafoin partisipa CCM iha resintu AMB tersa feira, 28/07/2026.
Hatan ba preokupasaun ne’e, Diretora BTL.EP Munisipiu Baucau Adriana Belo da Rosa rekoñese, projeitu kanalizasaun ne’e tarde tamba iha fatores hanesan iklima, transporta material no asuntu social, maibe nia parte garante projeitu referida sei finaliza bainhira komunidade apoio kontribui no kopera hodi bele selera lalais projeiitu ne’e.
“Projeitu ne’e la’o tarde ami hapar duni maibe iha fatores balun fo impaktu ba projeitu ne’e mak hanesan transporta material ga ekipamentus ne’ebe atu uza ne’e laos produs iha Timor maibe iha rai liur, segundu ita nia iklima tamba kondisaun dalan inklui asuntu sosial hanesan halo impedementu, maibe projeitu ne’e sei finaliza”. Dehan Adriana
Projeitu kanalizasaun bee mos husi Suku Defawasi ba iha Postu Baguia Vila ho Distansia kilometru 12 ho orsamentu hamutuk dolares Amerikanu $ 846.600.
Ekipa Kobertura : RCLM Baucau
