RCLM Baucau (22/06/2026)—Timor-Leste lakon lideransa di’ak ida eis Prezidente Repúblika Francisco Guterres Lú-Olo’ ne’ebé povu sei tau konfiansa, maibé fila hikas sedu ba Aman Maromak nia kadunan Santu iha óspitál Prince Court iha Kuala Lumpur Malázia domingu kalan (21/06/2026), hafoin halo tratamentu saúde intensivu.
Veterana iha Munisípiu Baucau Maria Madalena dos Santos Fátima ‘Biki’ak, espresa sentimentu triste rona novidades maluk rezisténsia saudozu Francisco Guterres Lú-Olo hanesan mos lideransa di’ak ida iha Nasaun Timor-Lest,e ne’ebé iha mehi ho lideransa sira seluk atu dezenvolve nasaun no hadi’a povu nia moris, maibé fila sedu ona ba Aman Maromak nia kadunan Santu, tamba ne’e hato’o sentidu kondolensia profunda ba família.
“Ha’u nia sentidu kondolensia kle’an ba família no hanesan veterana sente triste, tamba lakon ita nia aman veteranu no lideransa di’ak ida ne’ebé ita nia esperansa sei moris atu nune’e bele halo esforsu ko’alia hamutuk ho lideransa sira seluk, oinsá mak atu dezenvolve ita nia nasaun ne’e, no hare povu sira tuir aman no Veteranus sira nia mehi katak povu tenke moris di’ak, maibé Maromak nia planu ita la hotu espera ohin ita lakon ita nia aman di’ak ida,” hateten Veterana ‘Biki’ak’ ba Jornalista sira iha vila Nova segunda ne’e.
Nia hateten, relasiona falesimentu antigu Prezidente Repúblika no Prezidente Parlamentu Nasionál, Francisco Guterres Lú-Olo estadu no Governu dekreta ona lutu nasionál durante semana ida, hahú loron 22 (ohin) to’o loron 28 fulan ida-ne’e (Juñu), tamba ne’e husu komunidade Baucau fó omenajem liu husi hasa’e Bandeira Nasionál RDTL iha ida-idak nia uma oin meia haste.
“Timor-Leste tomak Prezidente Repúblika fó sai ona Jornál Repúblika dekreta kona-ba lutu nasionál komesa hodi kalan Timor-Leste simu nutisia ita nia aman no eroi Francisco Guterres Lú-Olo hakotu ona is iha óspitál Malázia, ema hotu triste Bandeira ita nia hasa’e meia haste ka setenga tian,” Veterana Biki’ak afirma.
Enkuantu observasaun Jornalista RCLM iha Munisípiu Baucau liuliu área vila área vila Nova no vila Antiga, edifísiu públiku sira hasa’e Bandeira Nasionál RDTL meia haste, nu’udar sentidu lutu nasionál ba falesimentu saudozu Francisco Guterres Lú-Olo.
Ekipa kobertura : RCLM
