RCLM Baucau (12/05/2026)—Iha tempu besik diresaun Munisipal Transporte Terrestre Baucau, servisu hamutuk ho autoridade Munisipiu no PNTL, sei implementa Uniformidade ba kondutor sira ne’ebé lori transporte públiku, hanesan mikrolet no Angguna iha Munisipiu Baucau.
Diretor DMTK Baucau Máriano Pinto da Costa hateten, Dirasaun Transporte Komunikasaun hala’o ona enkontru ho Autoridade Munisipiu atu kondutor transporte publiku sira labele uza faru sinlet, fuma sigaru, maibe kondutori sira presija uza uniforminidade.
“Foin lalais ami tuir enkontru konsellu kordenasaun Munisipal Presidente Autoridade Munisipal fo ona atensaun ba kondutor sira ne’ebé maka lori transporte públiku tenke uza farda, labele uza faru singlet, labele fuma sigaru no ko’alia ho telepone, tamba fo impaktu la di’ak ba pasazeiru sira, tamba ne’e tempu badak ami sei tun ba kraik fo avizu ba kondutor atu kumpri regra ne’e”. Dehan Diretor DMTK Baucau Máriano Pinto da Costa ba jornalista sira iha nia kna’ar fatin Segunda feira (11/5/2026).
Diretur DMTK hatutan bainhira planu ne’e implementa, kondutor sira tenke uza ona uniforminidade, se la uza sei hetan multa tuir orden Autoridade.
“Motorista tenke uza uniforme tamba atu identifika lolos kondutor duni mak kondus kareta, tamba dala barak ita hetan keixa katak tama oras meudia kondutor sira fo fali ba azudante sira maka lori, ida ne’e fo ameasa, bainhira implementa ona maka sira la kumpri sei hetan sansaun selu multa”. nia esplika
Mariano hateten uniformidade ne’ebé kondutor sira atu utiliza, sira rasik maka ida-idak ba suku iha alfaiate, enkuantu kona-ba Kores diresaun transporte maka sei termina.
“Uniforme ne’e sira rasik maka ba sukat, sira rasik maka selu, ita nia parte fo hatene de’it uniforme ne’e ninia kores, i kores ne’e sei hanesan ho kondutor sira Dili nian uza”. Hatete Mariano
Diretor ne’e informa dadaun ne’e rejista ona transporte públiku hanesan, Mikrolet iha Munisípiu Baucau hamutuk 306, Misto 189 no bus hamutuk 90 totál hamutuk 585.
Ekipa Kobertura : RCLM Baucau
