RCLM Baucau—Sekretáriu Estadu Formasaun Profisionál no Empregu (SEFOPE) rejista estudante terseiru anu tinan akadémiku 2026 hamutuk 843, husi eskola sekundária públika no privada iha Postu Administrativu Baucau Vila atu partisipa iha Feira Kareira no Edukasaun, ne’ebé tuir planu sei realiza durante loron rua, komesa loron 6 to’o 7 fulan Agostu tinan ne’e iha Sentru Konvensaun Vila Antiga Baucau.
Diretór SEFOPE Munisípiu Baucau, Romaldo António de Souza, esplika programa feira kareira no edukasaun fó prioridade ba estudante terseiru anu, tanba sira sei remata estudu iha tinan ne’e bele hetan informasaun kle’an husi ezibidór hamutuk 30 resin kompostu husi sentru formasaun ne’ebé akreditadu husi SEFOPE, Instituisaun Ensiñu Superior iha Munisípiu Baucau, no mós Instituisaun Governu balun.
”Tempu ba alin sira partisipa másimu iha loron rua (6-7 agostu 2026) tanba SEFOPE bolu entidades hotu inklui universidade no sentru formasaun, grupu auto-empregu sira aprezenta nia aktividade no kriteriu asesu, oinsá asesu bainhira estudante finalista sekundaria la kontinua ba universidade tanba forsa ekonomia inan-aman la to’o,” dehan Roumaldo iha sentru formasaun SEFOPE Uatu-Lete Baucau.
Diretór Eskola Sekundária Tékniku Vokasionál Vila Nova Baucau, Elizario Deonisio dos Santos, apresia programa Feira Kareira no Edukasaun ne’e tanba ajuda estudante finalista sira atu hetan informasaun no foti desizaun ba sira-nia futuru.
Nia akresenta bainhira inan-aman la iha kapasidade finanseira atu suporta oan sira kontinua ba ensiñu superior, estudante sira bele hili atu tuir formasaun profisionál iha sentru formasaun sira hodi aumenta sira-nia abilidade no prepara an ba kampu servisu.
”Ami senti orgullu tebes involve estudante finalista desimu segundu anu sira iha programa exposizaun ka feira program sira ne’ebe atrai sira atu sira asesu no lori sira nia futuru ne’ebe di’k,” Diretór Eskola Sekundária Tékniku Vokasionál Vila Nova Baucau apresia.
Estudante hamutuk 843 ne’ebé sei partisipa iha Feira Kareira no Edukasaun ne’e mai husi eskola sekundária jerál no privada hamutuk 12 iha Postu Administrativu Baucau Vila ne’ebé fahe ba etapa rua.
Etapa primeiru estudante hamutuk 583 kompostu Eskola CAFÉ estudante hamutuk 65 estudante, ESG 01 Tirilolo 150, ETI 48, Eskola Sagrada Korasaun de Jesus 80, ESSA 100, ESG 02 140, etapa segundu estudante hamutuk 260 partisipa kompostu husi ESG Filiál Klik-Uaiga’e na’in 35, EPEC 50, ESG Paralelu Uailili 60, ESTV Fatumaca 40, ESG Paralelu Triloka 40 no ESG Paralelu Seidauk 35.
Enkuantu estudante sekundariu husi postu administrativu hitu seluk hanesan Baguia, Laga, Quelicai Antigu, Quelicai, Matebian, Vemasse no Venilale antes ne’e SEFOPE hala’o ona kareira no edukasaun liu husi akonselamentu.
Ekipa Kobertura : RCLM
