RCLM Baucau (22/04/2026)—Sekretariu Estadu Asuntu Toponímia Organizasaun Urbana (SEATOU), kuarta ne’e sosializa dekretu lei Ijene no ordem públika ba lideransa komunitariu husi suku 62 no autoridade postu administrativu 8 iha Munisípiu Baucau.
Diretóra Geral Toponimia no organizasaun Urbana Maria Odete Barros Florindo esplika, sosializasaun ne’e fokus ba dekretu lei lima ne’ebé dadaun ne’e SEATOU implementa, hanesan dekretu lei númeru 3/2024 Janeiru husi primeiru alterasaun husi dekretu lei númeru 33/2008, 27 Agostu kona-ba ba Ijene no orden públika, dekretu lei nu.29/2016 kona-ba toponimia organiza urbana, dekretu lei nu.2/2017 kona-ba rezidus solidus urbanas, dekretu lei no.51/2023 kona-ba publisitáriu no dekretu lei no.3/2026 kona-ba estasionamentu tranasporte iha fatin públiku no turizmu.
Maria afirma, sosializasaun ne’e realiza bazéia ba pedidu husi Autoridade Munisipál Baucau atu aumenta koñesementu Autoridade Komunitaria sira nian, hodi implementa iha báze komunidade sira bele kumpri.
“Ami iha esperansa sira komprende muintu bem tamba, ami la’ós foin mai halo sosializasaun maibe ida-ne’e atu hakle’an nafatin sira nia koñesementu ka sira komprende liu tan hodi implementa iha komunidade, maske seida’uk másimu,” dehan Maria ba Jornalista sira kuarta ne’e 22/04/2025.
Sekretáriu Munisipál Planeamentu Investimentu no Dezenvolvimentu Integradu Eduardo Filipe Ximenes konsidera, sosializasaun importante ba lideransa komunitariu suku sira atu komprende kle’an hodi implementa iha kada posto no suku.
“Dekretu lei ne’e la’ós atu implementa iha sidade urbana ba postu sira nune’e mos suku, tamba ne’e ita boot sira fokus para dekretu lei ne’e bele apar, balun bele kopi no halo print fahe ba xefe aldeia sira,” Reprezentante Prezidente Autoridade Munisipál Baucau fó hanoin.
Entretantu sosializasaun ne’e hala’o durante loron ida, ne’ebé realiza iha salaun Apuramentu Autoridade Munisípál Baucau.
Ekipa Kobertura : RCLM
