RCLM (03/06/2026)—Sarani sira husi Parokia Vila Nova Diocese Baucau habot fi’ar no devosaun ba Ilhas Sagrada Coração de Jesus no Inan Nosa Senhora do Rozáriu de Fátima, durante vizita kada sentru estasaun loron ida kalan ida.
Padre Paroku Parokia Vila Nova Baucau Bernardo Manuel da Silva hateten, ilhas Sagrada Coração de Jesus nu’udar mahein igreja parokia vila nova nian, tamba ne’e lori sai hamutuk ho ilhas Nosa senhora do Rozáriu de Fátima vizita sentru estasaun ne’ebé pertense ba parokia vila, ho objetivu atu halibur sarani sira hodi hametin fi’ar no devosaun ba Moromak.
“Ilhas rua nia vizita ne’e atu halibur sarani sira, atu hametin liu tan sarani sira nia fiar no devosaun ba Nain feto no fiar ba Maromak tamba, ita hare ohin loron ne’e sarani barak dalaruma la’o dok husi uma kreda no fi’ar komesa mihis, ho vizita ilhas rua ne’e atu hametin sira nia fi’ar hanesan sarani molok atu ba selebra nia festa padroeiru parokia vila nova nian,” dehan Paroku Parokia Vila Nova Baucau Bernardo Manuel da Silva iha Nagarjo Baucau.
Padre paroku husu sarani pertense parokia sagrada Coração de Jesus vila nova tenke fi’ar nafatin nu’udar kristaun katolika ba Maromak liu husi ilhas Sagrada Coração de Jesus no Nosa Senhora do Rozáriu de Fátima.
“Sarani sira pertense ba parokianu sagrada Coração de jesus vila Nova Baucau tenke hametin nafatin fi’ar ba Nai Maromak basa ho Nai Maromak de’it ita tau ita nia esperansa liu-liu devosaun ba Nain Feto, maske ita selebra fulan maiu remata ona la siginifika ita nia devosaun ba Nai Feto mos remata,” Padre Paroku Vila Nova fo mensajem.
Xefe Komisaun Organizador Sentru Santa Maria vila nova José Mendes, reprezenta sarani sente gratidaun simu ilhas Sagrada Coração de Jesus no Nossa Senhora do Rozário de Fátima, tamba tama sira nia bairu hodi fó grasa isin di’ak no moris unidade iha sosiedade.
“Ami sentru haat konsentra hamutuk simu ilhas ho kontente no domin tamba ilas Maromak nian oan ami fi’ar durante ne’e bele mai vizita direta ami nia bairu, maske ami kiak no mukit sofre oi-oin maibe ami nia fi’ar kesi metin iha domin no dutrina,” hateten reprezenta Sentru Santa Maria vila nova.
Enkuantu, ilhas Sagrada Coração de Jesus no Nossa Senhora do Rozário, sarani Sentru Santa Maria vila nova simu iha Nagarjzo ho lian dadoli, tebe-dai, drumband no kontinua prosizaun hodi lori ba sentru.
Antes ne’e, ilhas Sagrada Coração de Jesus no Nosa Senhora do Rozáriu de Fátima vizita ona sentru estasaun suku Caibada Makasa’e ,Casido suku Tirilolo, Bucoli, Aubaca Triloca, Bairu 200 kaza Militar Komponente Terrestre Lanud, alende ne’e sei vizita mos sentru sira seluk to’o remata iha loron 11 fulan juñu, hafoin lori hikas ba parokia vila nova no iha loron 12 junu realiza misa agradesementu aniversariu ilhas sagrada Coração de Jesus ne’ebé sai mahein parokia vila nova.
Ekipa Kobertura : RCLM
