RCLM Baucau (20/05/2026)—Autoridade sivil no seguransa hamutuk ho Veteranu, inklui komunidade no estudante sira partisipa masimu iha selebrasaun loron Restaurasaun Independensia loron 20 fulan Maio tinan 2026 ba dala 24, iha suku Ueru-Mata Postu Administrativu Laga Munisipiu Baucau, hodi fo onra no glora ba Herio no Heroina sira, ne’ebe sakrifika an ba Timor Leste nia Independensia.
Administrador Postu Administrativo Laga João Freitas de Castro hateten, tema ba selebrasaun loron Restaurasaun Independensia tinan ida ne’e importante tebes, tamba motiva ema hotu hamutuk atu hari’i nasaun ida ne’ebe sai justu inkluzivu, rejilente ba bebeik.
Administrador hatutan Durante tinan rua nolu resin hat ukun an, dezenvolvimentu infraestrutura iha Postu Administrativu Laga dadaun ne’e la’o neneik maibe ba bebeik.
“Ami Autoridade hare katak dezenvolvimentu la’o iha Postu Administrativu Laga hare ba infrastrutura hanesan estrada komesa la’o, programa PNDS mos ajuda ona ami no oinsa ami Autoridade halo planu i ohin loron ami bele realiza liga ba eletrisidade hela aldeia tolu mak seidauk asesu, maibe tinan ida ne’e sei dada ba aldeia tolu ne’ebe seidauk hetan eletrisidade.”Dehan APA Laga ba jornalista sira iha suku Ueru Mata quarta, 20/05/2026.
Veteranu 24 anos Marçal Inacio da Costa ‘Mautimur’ hateten, husu ba Deputadu no jerasaun foun sira atu respeita lideransa funu nain sira, tamba sira la iha Timor leste sei la hetan Independensia.
“Hau husu ba jerasaun foun sira no deputada deputadu iha paralamentu Nasionál atu respeita Lider rezistensia sira, tamba sira mak ita Timor bele ukun an.” Hatete Mautimur
Entertantu Reprejentante komunidade Xefe suku Ueru-Mata Sabino Martins hateten, sente orgullu no kontente tebes tamba komemorasaun loron Restaurasaun Independensia Postu Administrativu Laga nian, selebra iha suku Foun Ueru-mata.
“Hau orgullu no sente kontente tamba loron importante ne’e, selebra iha ami nia suku foun ne’ebe eziste iha tinan 2025.” Hateten Xefe Suku
Atividades ne’ebe ajusta ba selebrasaun loron Independensia ba dala rua nolu resin hat hanesan jogo desportu komunitario, halai maratona, no kalik inklui animasaun dansa tradisional, hodi anima komunidade sira, enkuantu total orsamentu ne’ebe aloka ba komemorasaun Restaurasaun Independensia hamutuk rihun hitu atus tolu resin, ne’ebe mai husi entidades sira hotu husi suku sia Postu Administrativu Laga, inklui Sidadaun Suku Ueru Mata nia oan iha diaspora.
Ekipa Kobertura : RCLM Baucau
