RCLM Baucau (08/05/2026)—Polísia Nasionál Timor-Leste (PNTL) iha Munisípiu Baucau, enkoraja juvetude suku 13 iha Postu Administrativu Baucau vila, hatudu disiplina durante jogu komunitáriu modalidade futsál bá mane no voli ból bá feto, atu festeza loro 20 de maio Restaurasaun Independénsia Timor-Leste ba dala-26 tinan ne’e (2026).
Segundu Komandante PNTL iha Munisípiu Baucau, Superintendente Polísia Fasio de Jesus Lima hateten, ekipa jogadór liu liu juvetude suku sira Postu Administrativu Baucau vila bainhira hatudu jogu disiplina, responsabilidade, amizade no kumpri regulamentu jogu komunitáriu hodi anima komunidade iha situasaun páz no estabilidade.
“Ita nia komunidade anima ka diverti sira iha jogu komunitáriu ne’e, sira sente iha ambiente páz harmonia ka estabilidade iha jogu to’o ida-idak nia fatin,” Segundu Komandante PNTL Munisípiu Baucau hato’o enkorajamentu ne’e bainhira hato’o intervensaun iha abertura Jogu Komunitáriu Postu Baucau vila ne’ebé realiza iha kampu futsál kompaña Bravo Batallão Ordem Públiku vila Nova sesta ne’e.
Alende ne’e, Superintendente Polísia Fasio informa, observasaun komandu PNTL Munisípiu Baucau, situasaun jerál iha territóriu Baucau mudansa boot tamba, ema hotu konsénsia kontribui makás bá estabilidade.
“Mudansa sira ne’ebé iha husu atu hadi’a di’ak liu tan nune’e Baucau ema labele bolu dehan muturabu, maibé ita mudan naran ne’e bá ‘muturau’, maske iha problema kikoan sei akontese maibé buka malu tur hamutuk kria nafatin ambiente ne’ebé harmonia hahú ita an rasik ba ita nia maluk, bairu, Aldeia, Suku, Postu, Munisipiu to’o nivél nasionál,” Segundu Komandante PNTL Munisípiu Baucau tenik.
Entretantu Jogu Komunitáriu Postu Administrativu Baucau vila realiza ho intensaun kontribui hametin páz entre suku, hodi komemora loron restaurasaun Independensia Timor-Leste ba dala-24 (2026).
Komisaun organizadora rejista ekipa jogadór modalidade futsál mane hamutuk 13 kompostu husi suku Bahú, Buibau, Builai, Buruma, Bucoli, Gariuai, Caibada, Caibada Makasa’e, Tirilolo, Triloca, Samalari, Seisal no Uailili, enkuantu modalidade voli ból feto ekipa hamutuk 9 nune’e totál ekipa hamutuk 22.
Enkuantu Governu liu husi Ministériu Juvetude Desportu Arte no Kultura (MJDAK) apoia orsamentu hamutuk $ 3,500 ba jogu komunitáriu Postu Administrativu Baucau vila kompostu, modalidade haat hanesan futsál mane, voli ból feto, maratona inklui jogu tradisionál han kalik.
Ekipa Kobertura : RCLM
