RCLM Baucau (13/05/2026)—Estrutura Konsellu Suku Osso-Huna, Postu Administrativu Baguia Munisipiu Baucau, sei implementa atividade programa Nasionál Dezenvolvimentu Suku (PNDS) tinan ne’e (2026), prioritiza halo konstrusaun kampu multifusaun.
Xefe suku Osso-Huna Paul dos Reis Piedade hateten, planu implementa atividade PNDS tinan ne’e prioritiza kampu multifusaun bazéia ba desizaun kolletiva kompostu husi konsellu, komunidade inklui dirijente eskola báziku sentrál Osso-Huna no Eskola sekundaria jerál Taur Matan Ruak.
Lideransa komunitariu ne’e informa, durante ne’e Suku Osso-Huna laiha kampu multifusaun adekuadu ba juvetudu no estudante atu utiliza hala’o treinamentu ka prátika desportu.
“Durante ne’e ami suku Osso-Huna iha kampu provizória maibé tempu udan hanesan ne’e, ita halimar taho laran entaun ita sente ladún di’ak, tamba estudante hatais farda halimar bola sira taho hotu de’it entaun, konsellu suku tur hamutuk komunidade inklui Diretór sira hili Propriedades PNDS suku Osso-Huna halo konstrusaun kampu multifusaun,” dehan xefe suku Osso-Huna ba RCLM liu husi Via Telfone kuarta ne’e.
Nia esplika, prosesu implementasaun dadaun ne’e, iha feze sosializasaun sei kontinua konvoka reuniaun hafoin loke aprovizionamentu ba empreza sira ne’ebé manán komesa implementa ona konstrusaun kampu multifusaun, maibé problema hasoru estrada kotu iha mota Baçar-Uai, Ministériu relevante hadi’a lalais sei hatarde atividade PNDS, tamba labele tula materiál konstrusaun to’o suku Osso-Huna.
“Agora dadaun faze sosializasaun hotu tama enkontru benifisiariu loke kotasaun ba empreza, bainhira manán implementasaun bele la’o ona, maibé estrada mak kotu ne’ebé sei impaktu ba projetu hirak ne’e, Autoridade Lokál ne’e preokupa.
Enkuantu, orsamentu governu liu Ministeriu Administrasaun Estatál preve atividade PNDS suku Osso-Huna hamutuk dolár amerikanu rihun haat nolu ($ 40,000,00), kompostu infrastrutura rihun tolu nolu resin haat ($34,000,00) no operasionál rihun neen ($ 6,000.00).
Suku Osso-Huna kompostu aldeia tolu hanesan Aldeia Betulari, Uaibutai no Uaicadae, uma-kain atus 4 resin no populasaun hamutuk 984.
Ekipa Kobertura : RCLM
