RCLM-Baucau (29/07/2026) —Ministeriu Solidariédade Sosiál no Inkluzaun (MSSI), fornese apoiu materiál konstrusaun ba komunidade vulnerável uma-kain lima (5), iha Postu Administrativu Matebian, Munisipiu Baucau, tanba benifisiáriu sira hela uma kondisaun aat maibe laiha kbi’it.
Diretór Centru Solidariedade Sosiál Munisipiu Baucau, Albino Nicolão Freitas esplika apoia sosiál ne’e, relasiona vizita domisiliáriu Ministra Solidariédade sosiál no inkluzaun ho nia vise-ministra iha Postu Matebian,identifika direta benifisiáriu sira moris vuneravél,tanba uma kondisaun aat tebes maibe sira laiha kbi’it atu konstrui uma foun tanba ne’e Ministériu Solidariédade Sosiál fó apoiu.
“vizita domisiliáriu Ministra Sosilidade Sosiál no Inkluzaun ho nia vise identifika benifisiáriu sira nia hela fatin ladignu, entaun ministra foti desizaun apoiu matérial konstrusaun restu husi dezastre naturais nian uluk stok sei iha hanesan sementi, kalen ita apoiu, sasan seluk hanesan janela odamatan buka meius buka osan hodi hola,” hateten Albino ba RCLM iha nia kna’ar fatin vila nova Baucau kuarta ne’e.
Nia akresenta, apoiu refere lainklui orsamentu mão-de-obra ba traballadór sira, maibe iha kordenasaun serbisu entre Autoridae Postu, Suku no Sentru Solidariédade Sosiál Munisipiu voluntáriu serbisu konstrusaun uma ba benifisiariu.
“Ita kordena Autoridade Postu, na’in xefe suku sira mobiliza família no komunidade liu-liu joven sira iha suku apoiu voluntariu ita halo uma, tamba orsamentu mão-de-obra ka selu bada’en osan laiha ita apoiu voluntáriu,” tenik Diretor Sentru Solidariedade Sosial Baucau.
Enkuantu, benifisiáriu vunerável hamutuk uma-kain lima iha Postu Matebian kompostu husi suku Laisorulai de baixo uma-kain rua no suku Lelalai uma-kain tolu.
MSSI hamutuk ho Autoridade Postu no Suku finaliza ona konstrusaun uma ida ho medida 6×6 kompostu husi kuartu rua, sala vizita ida no kompleta dapur inklui haris fatin no foin lalais ne’e entrega ona ba benifisiáriu uma-kain ida, entretantu uma ida sei iha faze konstrusaun bainhira finaliza hafoin entrega ba benifisiariu no tolu seluk sei konstrui fazeadamente.
Sentru solidariédade sosiál inkluzaun Baucau husu ba Autoridade Postu no Suku atu identifika nia komunidade kondisaun vuneravel bele aprezenta proposta, nune’e futuru bele apoiu tuir kbi’it hosi governu liu-liu Ministeriu Sosilidaridade Sosial no Inkuzaun.
Ekipa Kobertura : RCLM
