RCLM Baucau (23/06/2026)—Ministeriu Obras Publika (MOP) liu hosi Departamentu Manutensaun no konservasaun estrada pontes, husu kompañia sira ejekuta projetu estrada rurál iha Munisipiu Baucau komesa tinan 2022 maibe to’o agora seida’uk hotu.
Xefe Departamentu Manutensaun no Konservasaun Estrada Pontes, Rogerio da Costa Freitas hateten, projetu estrada rurál implementa iha Munisipiu Baucau hamutuk pakote haat nolu resin, maibe husi númeru ne’e pakote rua nolu resin MOP avalia servisu nei-neik no seida’uk atinji tarjetu, tamba ne’e MOP nasionál no Mmunisipiu konvoka enkontru ho jerente kompañia no enjineiru sira, ho objetivu avalia dejafius no buka solusaun hodi aselera projetu iha tinan ne’e tenke finaliza.
Rogerio afirma, durante enkontru avaliasaun dirijente kompaña aprezenta dejafius ne’ebe hatarde projetu mak hanesan problema sosial, menus finanseiru, ekipamentus no rekursu umanus.
“Ita fó sira fim do anu ida ne’e tenke hotu tamba sira nia kontratu finalmente hotu entaun,ita fo hanoin ba kompaña sira servisu lalais tinan ne’e bele remata se la hotu ita planu balun estende, balun taka tamba estende to’o tiha ona dala haat no lima no kansela loke fali tenderizasaun ba kompañia seluk,” hateten Rogeiro iha salaun Servisu Munisipal Obras Publika Vila Nova Baucau.
Diretora Kompañia Nautetu Fátima Unipesoal Limitada, Maria Madalena dos Santos Fátima, iha esperansa tinan ne’e konklui projeitu estrada rurál ne’ebé implemta, maibe husu komunidade sira kopera nune’e labele mosu problema sosiál no asegura seguransa traballador sira hodi aselera servisu iha terenu.
“Iha ami nia planu rasik tinan ida ne’e ami bele finaliza servisu maibe husu labele mosu iha situasaun sosiál no siguransa ba ami, tamba fatin balun ami nia enjineiru hetan ameasa,” dehan Diretora Kompañia Nautetu Fátima Unip Limitada.
Enkuantu, Diretora Kompañia Nautetu Fátima Unipesoal Limitada apresia mos MOP tamba, kada trimestre sempre konvoka reuniaun ho kompañia implementador projetu rurál iha Baucau, hodi avalia progresu servisu no dejafius sira hodi buka solusaun.
Ekipa Kobertura: RCLM
