RCLM Baucau (26/05/2026)—Governu liu husi Ministeriu Juventude Desportu Arte no Kultura planeia atu haluan Gináziu Munisipiu Baucau, hodi utiliza ba desportu multifunsaun tamba dadaun ne’e sei klot.
Ministru Juventude Desportu Arte no Kultura, Nelio Isaac Sarmento observa, rai área Gináziu Munisipiu Baucau sei iha espasu, maibe Gináziu autál klot tamba ne’e tékniku sira halo identifikasun no levantamentu medidas rai ne’ebé abandona no kontinua dezeña Gináziu foun, bainhira remata tinan ne’e bele implementa obra fíziku.
Membru nonu Governo ne’e afirma, kona ba orsamentu preve ba Gináziu foun Munisipiu Baucau, depende halo levantamentu dadus no dezeña finaliza foin bele hatene.
“Ita iha ona planu identifika fatin ba Gináziu (GMT) Baucau, ida ne’e kikoan demais, rai ita iha luan teb-tebes entaun ita bele hadi’a ka sobu halo fali foun hodi hala’o ba desportivas, agora ita identifikasaun ba medida rai hotu tama ba dezeñu ita bele hahu halo,” dehan Nelio Isaac iha Gináziu vila nova Baucau bainhira abertura MJDAK Cap 2026 ambitu liga FVTL terseira divizaun.
MJDAK akresenta, dadaun ne’e planeia fokus hadi’a infraestrutura desportu iha Nasionál no Munisipiu, bainhira finaliza hafoin kontinua ba Postu, Suku ne’ebé fasilidade laiha no balun aat.
“Agora ita fokus lai Munisipiu no Díli, tamba exemplu iha Munisipiu Baucau estadium ida futebol ita presiza upload tan hanesan para fatin seidauk di’ak depois buat barak seida’uk diak, ida ne’e tama hotu planu bainhira halo Gináziu stadium Munisipál Baucau ita hare mos ba parkiran ho ema sira atu mai joga,” tenik Nelio.
Jogadora Voleibol Ligia Ornai apresia planu MJDAK atu haluan Gináziu Baucau, nune’e futuru iha espasu ba joven sira aplika talentu desportu, tamba durante ne’e menus fasilidade iha Munisipiu atu utiliza ba área desportu nian.
“Nu’udar jogador Munisipiu Baucau sente kontente ho planu MJDAK haluan Gináziu Baucau, tamba bele rezolve preokupasaun joven ne’ebe iha talentu desportu, maibe laiha fasilidade,” hateten Ligia.
Enkuantu Gináziu Munisipiu Baucau ne’ebé MJDAK trasa ba planu hodi haluan tamba, uza ba desportu multifunsaun hanesan voleibol, futsal, basketbol no desportu seluk tamba dadaun ne’e espasu sei klot nune’e sei utiliza de’it ba modalidade voleibol, basketbol no atleta taekwondo.
Ekipa Kobertura : RCLM
