RCLM Baucau (21/04/2026)—Iha ámbitu selebrasaun loron fundasaun Baucau ba dala-167 (20/04/1859-20/04/2026), Prezidente Konsellu Munisípál Kombatente Libertasaun Nasionál (KMKLN) Baucau, enkoraja jerasaun foun juvetude sira, kapasita an atu sai matenek hodi kontribui prosesu dezenvolvimentu Nasionál.
Prezidente KMKLN Baucau Cornelho Gama L7 hateten, Kombatente Libertasaun Nasionál la konkorda juvetude sira kria instabilidade hodi estraga nasaun iha era ukun an, maibe tenke estuda makas hodi lidera fali nasaun.
“Baku malu, tuda kareta ne’e estraga nasaun ami la konkorda tamba, uluk ami terus, kanek, balun mate, tiru, hahan laiha ne’ebé ami lakohi joven ida halo rungu ranga. “L7 hato’o enkorajamentu ne’e iha resintu Administrasaun Munisípál Baucau segunda (20/04/2026).
Eis Komandante rejiaun tres iha Munisípiu Baucau ne’e akresenta, sei kontinua avalia atetude juvetude sira nian, bainhira halo problema sei prosesa tuir lei.
Alende ne’e nia haktuir, nu’udar veteranus kumpri ona misaun durante tinan 20 resin ba kotuk liberta ona nasaun, tamba ne’e jerasaun foun agora hanoin iha kada familia oinsá halo mós produsaun produtu lokal, hodi hetan rendimentu sustenta ekonomia uma laran.
“Joven halo rungu ranga haruka polísia kaer fó justisa ba nia, tamba ne’e husu ba joven sira saida mak hanoin oinsá halo tos halo natar mos prepa ekonómia, ami veteranus lakohi joven estraga nasaun tamba, ema rihun ba rihun mate ba nasaun ida ne’e,” L7 hatutan.
Enkuantu fó enkoraja mos ba juvetude ne’ebé involve an arte marsias no rituis, eskola sai ema intelektuál hodi prepara rekursu iha instituisaun governu.
Ekipa Kobertura : RCLM
