RCLM Baucau (26/05/2026)—Komunidade hamutuk uma-kain neen (6), afeta ba dezasdtre natuais rai halai kauza husi udan boot akontese, husi fulan marsu to’o loron 21 fulan maiu iha suku Abo Postu Administrativu Matebian Munisipiu Baucau.
Vitima afetadu dezastre naturais Marcos dos Santos haktuir, nia uma hetan estragus tamba fondasi monu no kuartu balun nakfera kauza husi rai halai , tamba udan boot akontese iha semana primeiru no segundu fulan maiu ne’e.
Nia dehan, dezastre natuais ne’e ameasa tebes ba familia ne’ebe hela uma ne’ebe iha area risku, bainhira tempu kalan deskansa, tamba ne’e husu parte kompetente apoia material rekoperasaun nune’e halo fali uma iha fatin seguru.
“Udan boot iha maiu nia laran semana rua hau nia uma fou-foun halo gasta osan sembilan pulu lapan ribu lima ratus, se estadu rekoiñese bele hadia ba, tamba dezastre naturais halo uma fera,” haktuir Marcos.
Fatin hanesan vitima Nesia da Costa Pinto senti triste, tamba ho kondisaun gravida, uma hetan afetadu ba rai halai no impaktu tebes ba vida umana.
“Triste tebes ami nia uma rai halai sobu tiha ona, tanba ne’e husu nai ulun sira ajuda ka tau matan netik, tamba halo fali uma mós nesesidade la to’o ona, vítima dezastre ne’e husu.
Xefe aldeia Daemena Joaquim Domingos Soares relata, hafoin nia komunidade afetadu dezastre naturais halo levantamentu no submete ba autoridade protesaun sivil munisipiu Baucau, no apoia ona emerjensia maibe kona ba rekoperasaun parte autoridade hein prosesu.
“Akontesementu dezastre naturál hau nia komunidade ita informa ba sosiál suku halo levantamentu dadus, no ba Postu aprezenta ba Munisípiu mai fahe sasán emerjensia, apoia rekopersaun tama kriteria ka lae ne’e kompeténsia Munisipiu mak hatene, maibé nu’udar autoridade nafatin akompaina no lahusik komunidade monu susar laran,” dehan Xefe Aldeia
Xefe Gabinete Gestaun Risku Dezastre Autoridade Protesaun Sivil Muisipiu Baucau Basilio Amaral konfirma, prosesu apoia rekoperasaun ba familia afetadu dezastre naturais suku Abo sei prosesa, tamba ne’e vitima sira presiza hein.
“Dadus Postu relata mai ita alista halo planu apoiu kedas sasán emerjensia, prosesu rekopersaun ne’e sei tempu naruk ne’ebé ita hein prosesu depois fó informasaun ba autoridade,” hateten Basilio Amaral.
Enkuantu husi fulan janeiru to’o 21 maiu ne’e, iha Munisipiu Baucau kompostu Postu Administrativu ualu APC rejista vitima dezastre naturais hamutuk uma-kain liu tolu nolu, ho tipu dezastre natuais hanesan rai halai, anin sobu uma no insendiu.
APC nafatin alerta ba populasaun tomak liu-liu hela iha foho lolon, tasi ibun no mota ibun, bainhira akontese udan no anin boot ses husi fatin risku sira nune’e labale fo risku ba vida umana.
Ekipa Kobertura : RCLM
