RCLM Baucau (27/04/2026)—Komunidade hamutuk atus lima tolu resin sia (539), hetan tratamentu saúde durante loron rua iha programa kampaña moris saúdavel, ne’ebe realiza iha aldeia Saebere suku Guruça Postu Administrativu Quelicai Antigu Munisipiu Baucau.
Kampaña moris saudavel ne’e inísia husi Ministériu Kordenadór Asuntu Sosiais no Gabinete Vise Primeiru Ministru Asuntu Sosiais, ne’ebé kopera servisu ho Asosiasaun Médiku Timor-Leste (AMTL) ho objetivu aumenta konsénsia komunidade kona-ba importánsia moris saudavél, prevensaun moras no Promosaun Saúde públika iha área rurál.
Vise Primeiru Ministru, Ministru Kordenadór Asuntu Sosiais no Ministeriu Dezenvolvimentu Rurál Habitasaun Komunitariu, Mariano Assanami Sabino hateten, kampaña moris saudavél ho intensaun hakbesik saúde ba komunidade, atu moris iha kondisaun fiziku saudavél hodi halo komunikasaun iha atividade diaria.
“Atividade ne’e (kampaña moris saudavél) objetivu primeiru atu hakbesik saúde ba komunidade, segundu objetivu halo nusa komunidade no ita hanoin saudavél tamba, ita hanoin saudvél mak ita hasai liafuan di’ak ke furak hanoin di’ak mak ita sei kria situsaun, di’ak entaun ida ne’e saúde preventivu importante tebes,”esplika Ministériu Kordenadór Asuntu Sosiais no Gabinete Vise Primeiru Ministru Asuntu Sosiais bainhira ensera programa kampaña moris saudavél iha Guruça sábado fim de semana ne’e.
Prezidente AMTL Herculano Seixas Dos Santos afirma, atividade kampaña moris saudavel ekipa saúde halo atendimentu hahu ho estudante hamutuk 166, ho ativiade promosaun edukasaun saúde no halo eskrening labrik tinan lima to’o sanolu resin lima, alende ne’e iha loron tuir mai halo konsulta jerál ba komunidade iha área espesializada hitu hanesan konsulta matan no distribui oklu, konsulta moras laran, kardiolojia no eskrening ba komunidade ne’ebe sofre moras fuan, moras kulit, infesioza, moras nehan.
“Komunidade hela área rurais mak vulneravel liu ba moras infeksioza moras la’os kontasiozas, mal nutrisaun no mos falta informasaun saúde, kompara ho komunidade hela área urbana sira fasil tebes ba fasilidade saúde, enkuantu sira hela área remotas iha limitasaun atu hetan informasaun no mos asistensia liu husi konsulta médika espesializada. AMTL dentru nia misaun atu promove bem estar ba ita nia povu moris saúdavel,”dehan Herculano.
Prezidente Autoridade Munisipiu Baucau Veneranda Eurico Lemos Martins, apresia programa kampaña moris saúdavel ne’ebe inisia husi Ministériu Kordenadór Asuntu Sosiais no Gabinete Vise Primeiru Ministru Asuntu Sosiais, ne’ebé kopera servisu ho Asosiasaun Médiku Timor-Leste (AMTL), hodi fo tratamentu saúde ba komunidade husi labarik to’o ferik no katuas sira, tamba ne’e husu kontinua programa referida ba komunidade Munisipiu Baucau ne’ebe hela área rurál seluk.
”Husu nafatin atu programa ne’e kontinua nafatin ba postu no suku sira iha remotas, tamba dalabarak iha komunidade labele asesu ba fasilidade saúde, tamba ne’e ita agradese programa ne’e bele to’o iha ne’e,” dehan PAM Baucau.
Komunidade suku Guruça Sabino Pereira sente kontente ho prezensa Assosiasaun Mediku Timor-Leste to’o sira nia fatin hodi fó tratamentu saúde besik ba sira, tamba durante ne’e hetan moras atu fasilidade saude distánsia dok.
“Ami komunidade suku Guruça hela area remotas susar atu asesu ba médiku, maibe ho programa kampaña moris saudavél ami sente programa sáude nian,” reprezentante komunidade Guruça apresia.
Enkuantu, observasaun Jornalista RCLM iha terenu nota, iha atividade kampaña moris saudavel ne’e maske udan maibe komunidade sira entosiazmu halo konsulta ba sira nia saúde, husi ekipa Asosiasaun Médiku Timor-Leste.
Suku Guruça kompostu aldeia 5 hanesan aldeia Eu-Afa, Fae-Ua, Lacolela, Saebere no Uadaboru ho uma-kain hamutuk 618 no populasaun 2.586.
Ekipa Kobertura : RCLM
