RCLM-Baucau (08-06-2026)—Klube Matebian hosi modalidade voleiból mane, husi Postu Administrativu Baguia no klube feto Loron-Matan PNTL sai kampeaun iha kompetisaun Ministeriu Juventude Desportu Arte no Kultura kap, tinan 2026 iha ámbitu Liga Voleiból Timor-Leste (LVTL) terseira divizaun ne’ebé realiza iha Munipiu Baucau.
Kompetisaun finál MJDAK kap tinan 2026 iha ámbitu Liga Voleiból Timor-Leste (LVTL) terseira divizaun ne’ebé hala’o iha Jinázio vila Nova Baucau domingu (horeseik), modalidade mane klube Matebian sai primeiru lugar (kampeaun) hafoin manan klube Legen Batako ho rezutadu 3-2, enkuantu modalidade feto klube Loron-Matan PNTL halakon klube Zona Fatumaka ho rezultadu 3-0.
Prezidente Federasaun Voleiból Timor-Leste Inosensio Araujo da Silva hateten, klube rua Matebian no Loron-Matan PNTL ne’ebé sai kampiaun Liga Voleibol Timor-Leste (LVTL) terseira divizaun sei reprezenta Munisipiu Baucau, tuir kompetisaun segundu divizaun iha nasionál (Díli) ne’ebé tuir planu realiza fulan jullu to’o setembru tinan ne’e.
Prezidente FVTL husu klube rua halo preparasaun másimu ba segundu divizaun nian, nune’e hetan rezultadu pozitivu bele hakat ba primeira divizaun.
“Sira ne’ebé sai kampeaun sira sei reprezenta klube Munisipiu Baucau ba 2 divizaun iha Díli, tamba ne’e sira tenke prepara didi’ak ho klubu maibe lori Baucau nian naran, husu mos autoridade Baucau bele apoiu sira durante sira nia preparasaun atu ba kompete 2 divizaun iha Díli, kuandu sira hetan de’it segundu no terseiru lugar iha 2 divizaun sira bele ba 1 divizaun,” hateten Inosensio iha Jinázio Vila Nova domingu (07-06-2026).
Reprezentante Autoridade Munisipál Baucau Fransisco Xavier da Silva Guterres, apresia klube hotu ne’ebé partisipa MJDAK kap tinan 2026 iha ámbitu Liga Voleiból Timor-Leste (LVTL) terseira divizaun, ne’ebé realiza iha Munisipiu Baucau no parabeniza klube primeiru lugar feto no mane ne’ebé sei reprezenta Munisipiu Baucau partisipa kompetisaun segundu divizaun iha nasional.
“Hitória voli, futsál Baucau naran sempre iha, tamba ne’e iha fulan Juñu ba Jullu imi (klube Matebin no Loron-Matebian PNTL) halo re-formasaun klube laran no reunifika jogador husi klube seluk hafoin partisipa kompetisaun 2 segundu divizaun iha nasionál,” dehan Reprezentante Autoridade Baucau.
Reprezentante jogador klube Matebian no Loron-Matan PNTL, Grigorio ho Norbeta Ximenes Belo, sente orgullu tamba, hetan primeiru lugar kompetisaun MJDAK tinan 2026 iha ámbitu Liga Voleibol Timor-Leste(LVTL) terseira divizaun ne’ebé realiza iha Munipiu Baucau, alende ne’e sira hein desizaun Prezidente klube halo selesaun jogador ne’ebé di’ak no foinsa’e hodi partisipa LVTL segundu divizaun iha nasionál.
”ami senti kontenti joga di’ak too hetan primeiru lugar no ami klube Matebian sei halo treinu no preparasaun ho di’ak atu segundu divizaun mai nasionál ami kompete la’os klube nia naran maibe lori munisipiu Baucau nia laran,ami klube Loron-Matan PNTL senti kontenti partisipa iha jogu LVTL terseira divizaun tamba anima komunidade sira mos bele partisipa,preparasaun segundu divizaun ami sei servisu hamutuk ho prezidente hili maluk jogador husi klube sira idade ki’ik hamutuk atu partisipa sigundu divizaun,”hateten Reprezentante jogador klube Matebian no Loron-Matan.
Kompetisaun Ministeriu Juventude Desportu Arte no Kultura(MJDAK) Kap tinan 2026 iha ámbitu Liga Voleibol Timor-Leste(LVTL) terseira divizaun ne’ebé realiza iha munisipiu Baucau hamutuk klube 16 mak partisipa kompostu modalidade voleiból mane klube hamutuk 8 no feto klube hamutuk 8 mak partisipa durante jogu ne’ebé halo abertura iha loron 24 fulan Maiu foin lalais ne’e no ensera iha loron 07 juñu.
Iha kompetisaun finál ne’e,MJDAK-FVTL oferese tasa permanente no orsamentu hamutuk $750.00 ba primeiru lugar modalidade voleiból mane klube Matebian,segundu lugar klube Legen Batako tasa no osan $ 550.00, terseiru lugar klube Laisorulai hetan osan $ 400.00 no kuartu lugar klube Oslai Motor hetan ekipamentus voleiból bola hamutuk 5.
Enkuantu, modalidade voleiból feto klube Loron -Matan PNTL primeiru lugar hetan tasa no osan $ 750.00, segundu lugar klube Zona Fatumaca osan $ 550.00, terseiru lugar klube Fitun ho osan 400.00 no kuartu lugar klube Matebian hetan bola 5.
Ekipa Kobertura : RCLM
