RCLM Baucau (09/07/2026)—Nonu Governu Konstitusional liu husi Ministeriu Administrasaun Estatal, fasilita formasaun integradu ba rekursus humanus liu liu lideransa iha Munisipiu hat, hanesan Munisipiu Lautem, Viqueque, Manatutu no Munisipiu Baucau rasik, hodi prepara an didiak ba iha Dezentralizasaun Administrativa Poder Lokal iha tinan 2027.
Vice Ministru Estatal Jacinto Reguberto Gomes de Deus hateten, formasaun ne’e importante tebes tamba atu hasa’e abilidade kompetensia diretores lina sektorais sira nia koñesementu no kapasidade ne’ebe klean, bazeia ba lei no termu referensia ne’ebe ho diak.
Vice Ministru ne’e hatutan depois de formsaun, dirijente sira husi Munisipiu hotu-hotu prepara an didiak atu tama ba iha segundu avaliasaun ba kondiasaun minimu hodi hein anunisiu rejultadu, Munisipiu ne’ebe mak tama ba poder lokál.
“Segundu avaliasaun ninia prosesu la’o hela, maibe formasaun ne’e ba dirijente sira atu bele prepara aan hodi hein rejultadu ne’ebe mak sei fo sai hodi elisaun kamara Munisipal”. DehanVice Ministru Estatal Jacinto Reguberto Gomes de Deus ba Jornalista sira iha salaun Apuramentu tersa, 07/07/2026.
Entertantu Diretur Jeral Dezentralizasaun Governu Lokál Antonio Auguto Guterres hateten, iha tinan 2028 kontinua rekomenda ba Governu foun hodi apoio formasaun ba Munisipiu sira ne’ebe mak seidauk tama ba iha Dezentralizasaun Poder Lokál.
“2028 ita rekomenda ba Governu foun ba deit formasaun no kapasitasaun ema ne’ebe deit no avaliasõen kontinuasaun ba Munisipiu sira ne’ebe seidauk hetan oportunidade iha faze primeiru forma governu lokál”. Dehan Antonio
Entertantu Prezidente Autoridade Munisipiu Baucau Veneranda Lemos konsidera, formasaun ne’e importante tebes tamba kada Munisipiu prepara an ho diak hodi tama ba iha segundu avaliasaun, katak Munisipiu prontu ona tamba ne’e husu ba lideransa sira atu partisipa masimu hodi bele hetan materia ne’ebe foun liga ba iha dezentralizasaun poder lokal nian.
“Ita agradese tamba Ministeriu estatal fo sira nia kapasidade hodi divulga materia sira ne’e hotu, tamba ne’e akompaña didiak materia sira ne’e para hatene”. Hatete Veneranda
Materia ne’ebe Governu faselita ba lideransa sira durante loron hat mak hanesan materia kona Poder Lokal, kna’ar no responsabilidade, prosesu planeamentu no aprovizonamentu inklui Monografia no demografia Munisipiu, postu no suku.
Ekipa Kobertura : RCLM
