RCLM Baucau (09/04/2026)—Folin Kombustivel gajolina sa’e $ 1.35 centavos kada litrus no gajoel sa’e ba $ 1.47 Centavos iha postu abastasementu sira iha Munisipiu Bauca, iha ne’ebe mikrolete Baucau Vila lansa asaun mogok tamba pasajeirus liu liu estudante sira selu la tuir tarifas ne’ebe Dirasaun Nasional Transporte Terestres Munisipiu Baucau fo sai.
Porta Vos Joanico Abrio Gama hateten, folin kombustivel sa’e makas maibe pasajeirus sira kontinua selu la tuir tarifas ne’ebe mak iha hodi difikulta ba rendimentu, tamba ne’e husu ba pasajeirus sira atu selu centavos rua nolu resin lima (centavos 25), to’o centavos 50 bainhira sa’e kareta husi vila antiga to’o iha HoREX Baucau.
“Ita hatene mina sa’e iha Mundial, ami nia preokupasaun mak ne’e estudante hotu hotu lolos ne’e 15 cen, maibe dala ruma sira sa’e hamutuk nai hat nain lima sira fo mak 10 cen, tamba ida ne’e mak ami halo mogok ne’e, se bele pasajeirus sira bele selu kuarte to’o limu pulu sen bainhira tun iha hospital”. Dehan Porta Voz Joanico Gama ba jornalista sira iha Edukasaun nia oin Quarta Feira 08/04/2026.
Entertantu komunidade Domungus Adolfo Ximenes hateten, sente triste ho folin kombustivel ne’ebe sa’e makaas iha Timor Leste, maibe nesesidade obriga, obrigadu tenke ense mina ba transporte hodi faselita ba nesesidade loro loron.
“Hau sente triste tebes tamba mina agora folin sa’e maka’as, maibe nesesidade obriga ami tenke ense hodi nune’e bele faselita ita hodi hala’o aktividade loro loron”. Hateten Domingos
Entertantu Diretur Postu abastasementu Manudare Helio Fransisco da Costa hateten, bainhira kompaña ETO no PERTAMINA hasa’e folin kombustivel, iha ne’ebe operador postu abastamentu sira mos rasionaliza presu tuir kustu ne’ebe importador sira nian.
“Wainhira importador mina ne’ebe mak faan grossu mai iha Timor, bainhira sira hasae presu normalmente operador Postu Abastasementu iha fatin hotu hotu, inklui iha hau nia fatin hakarak ga lakohi ita tenke rasionaliza presu tuir kustu ne’ebe mak ita sosa husi fornesedor ga importador grossu ne’e rasik”. Dehan Helio
Tuir observasaun jornalista iha tereinu nota katak, mikrolete sira kontinua fali ona movimentu hodi buka pasajeirus, alende ida ne’e postu abastasementu iha Munisipiu Baucau kuaze tau presu kombustivel ne’ebe la hanesan.
Ekipa Kobertura : RCLM
