RCLM Baucau (03/06/2026)—Kompaña Estrela Resources no Estrela Murak Rai hamutuk ho Autoridade Nasional Minarais, inklui kompaña Local Manudare Unipesoal Lda apoio reabilitasaun faselidade bee mos durante fulan ida ho balun, iha ne’ebe inagura ona bee moos refere, ne’ebe entrega ba komunidade suku Uerumata Postu Administrative Laga Munisipiu Baucau, hodi hakman komunidade nia halerik ba bee mos durante tempu naruk nia laran.
Diretur dezenvolvimentu bussnes husi kompaña Estrela Resourses Chris Downs hateten, bainhira halo aktividade eksplorasaun minieuru iha suku Ueru Mata, komunidade sira hato’o preukupasaun kona ba problema bee moos, iha ne’ebe kompaña Estrela resources foti inisiativa hodi reabilitasaun bee moos ba komunidade sira, tamba ne’e husu ba komunidade sira atu tau matan no kuidadu hodi utuliza iha tempu naruk.
“Relasiona ho preokupasaun komunidade nian hau esforsu an hodi dada bee moos ba komunidade sira iha suku uerumata, ida ne’e to’o agora ita inagura ona”. Dehan Chris ba jornalista sira liu husi diskursu iha suku Ueru Mata Quarta, 03/06/2026.
Reprejentante Autoridade Nasional Minarais David de Arauju hateten, Autoridade Nasional Minarais nia papel ida mak atu asegura aktividades mineirus hotu-hotu, hodi tau matan ba meiu ambiente sira.
“Ida ne’e hanesan nia programa servisu no orsamentu ne’ebe mak aprova husi ANM ba periodu tinan 2026″. Haktuir David
Diretur Ezekutivo Eksplorasaun no Perfurasaun Angela Lay hateten, husu obrigadu ba komunidade sira tamba kolabora no servisu hamutuk ho kompaña, hodi bele finaliza projeitu reabilitasaun bee moos.
“Obrigadu barak ba komunidade Uerumata ne’ebe simu ona prejensa kompaña no kolabora hamutuk ho kompaña hodi bele finaliza projeitu ne’e to’o remata”. Dehan Angela
Xefe suku Ueru-Mata Sabino Martins hateten, nudar Autoridade Suku sente kontente no agradese ba kompaña Estrela resources tamba ho laran diak bele kanaliza ona bee mos ba komunidade sira.
“Nu’udar Autoridade Suku sente kontente no agradese tebes ba kompaña, tamba bele dada ona bee mos ba hau nia komunidade”. Hatete Sabino
Entertantu kompaña Lokal Manudare unipesoal Lda Helio Fransisco da costa hateten, prosesu rehabilita kanalizasaun bee mos ba komunidade sira kuaze fulan ida ho balun to’o finalize ho diak.
“Projeitu fiziku ne’e ami halo deit fulan ida ho balun to’o ohin loron ita inagura ona”. Haktuir Helio
Komunidade sira sente kontente tebes tamba bele asesu ona bee mos ho diak, tamba durante ne’e konsumu deit bee posu no udan been.
“Ami sente kontente, tamba hetan ona bee moos no ami prontu para atu segura hodi uza ba tempu naruk”. Dehan komunidade
Entertantu bee mos refere kanaliza husi bee matan Abarisi no Ufuira ho distansia kilometru tolu resin, ne’ebe benefisia ba komunidade uma kain atus rua sanolu resin hitu, no total populasaun hamutuk atus ualu rua nolu resin ida. Enkuantu projeitu kanalizasaun bee mos ne’e responsabiliza husi kompaña Manudare unipesial Lda, ho total orsamentu hamutuk U$ 710.400.
Ekipa Kobertura : RCLM Baucau
