RCLM Baucau—Governu liu hosi Ministériu Obras Públika tempu besik sei halo reabilitasaun estrada husi Postu Administrativu Venilale Vila to’o Turizmu, Relijiozu Foho Ariana iha Aldeia Liabala, Suku Uatu-Haco.
Administradór Postu Administrativu Venilale, José Freitas Boavida informa, kompañia konstrutor aprezenta ona karta koiñesementu no tuir planu tempu besik halo lansamentu fatuk dahuluk hodi halo reabilitasaun.
Autoridade Venilale agradese ba governu sentral liuliu Ministeriu Obras Públika ne’ebé responde preokupasaun estrada durante tempu naruk kondisaun aat, hodi difikulta komunidade sira nia movimentu asesu ba merkadu, eskola, sentru saúde no fasilidade públiku sira seluk iha postu Administrativu no Munisípiu.
”Estrada ne’e ezijénsia komunidade nian mai autoridade suku, Postu no Munisipiu tanba nia kondisaun susar tebes entaun presiza duni tau atensaun, kompañia aprezenta ona karta koinesementu mai ba implementasaun projeitu iha ona terenu ita sente kontente no apresia,” hateten Administrador Venilale.
Komunidade suku Uatu-Haco Herculano Manuel Siquera, sente kontente implementasaun projeitu reabilitasaun estrada ba sira nia suku iha tempu badak, maibe nia husu governu halo idiminizasaun ba sira nia proprietariu hanesan uma ne’ebé afetadu.
“Kona ba dezenvolvimentu ami simu no apoiu maibe sira promote ami sobu tiha uma husik de’it no bainhira mak ajuda orsamentu ba ami halo fila-fali ami nia uma,” komunidade afetadu rekomenda.
Enkuantu, estrada husi Venilale vila ba Ariana ne’ebe sei reablita iha tempu badak hamutuk kilometru neen resin (km 6,530 no kompañia Augusta Huhu Limitada orsamentu ne’ebe Ministériu Obras Públika preve ba projeitu ne’e hamutuk miliaun tolu resin ($ 3,715,130.09).
Observasaun RCLM iha ternu nota kompañia implementador prepara ona armazem iha suku Uai-Laha no komesa halo ona limpeiza estrada, alende ne’e komunidade sira voluntáriu sobu ona sira nia Baraka, uma varanda ne’ebé afetadu ba implementasaun projeitu.
Ekipa Kobertura : RCLM
