RCLM Baucau (13/05/2026)—Nesesidade bázika liu liu fós 25 kg husi kios sira iha suku Osso-Huna hahú folin sa’e, tamba empreza sira ho karreta durante fa’an sasán labele to’o suku rua hanesan Osso-huna no Afaloicai, kauza husi estrada iha mota Baçar-Uai Suku Hae-Coni kotu totál.
Xefe suku Osso-Huna Paul dos Reis Piedade informa, antes estrada husi diresaun Postu Administrativu Baguia ba suku rua seida’uk kotu, empreza sira fa’an fos 25 kg folin dolár Amerikanu sanolu resin haat ($ 14. 00), maibé atuál empreza sira labele ba, dadaun ne’e kios iha suku fa’an fós ba komunidade folin sa’e ba dolár Amerikanu sanolu resin neen ($16,00.)
“Agora dadaun transporte hakarak fa’an sasán liu la bele, impaktu ba folin fos sa’e dadaun ona, estrada sei di’ak otuan movimentasaun transporte liu fos 25 kg folin 14 dolár, agora sa’e ba 16 dolár” hateten Autoridade lokál Suku Osso-Huna liu via telfone ba RCLM kuarta ne’e.
Alende folin fós sa’e, Lideransa Komunitariu ne’e afirma, komunidade suku Osso-Huna no Afaloicai hetan moras grave, familia tenke lori la’o kuaze distánsia 2 to’o 6 km, hafoin ultrapasa estrada mota Baçar-Uai Suku Hae-Coni, hodi tula ba kareta ambulansia hodi halo tratamentu saúde iha sentru saúde Baguia ka transfere ba Óspitál Rejionál Eduardo Ximenes Baucau.
“Laiha estrada alternativa seluk, dadaun ne’e komunidade voluntáriu halo ponte tradisionál ho au hodi faselita komunidade no estudante ne’ebé la’o ain, komunidade ne’ebé mak moras grave labele kura iha Postu saúde Osso-Huna transporte la bá entaun sira bele hulan de’it moras ne’e mai to’o Hae-Coni, foin kareta ambulansia bele tula tamba liu ladi’ak,” akresenta Paul.
Enkuantu, Autoridade lokál ne’e husu Governu sentrál liu liu Ministeriu Obras Públika no Institutu Gestaun Ekipamentu Apoiu Dezenvolvimentu Infrastrutura (IGEADI), tempu badak halo normalizasaun ba estrada ne’ebé estragus grave, nune’e fasilita movimentu komunidade asesu merkadu, fasilidade saúde inklui funsionariu no Autoridade Suku partisipa enkontru iha Postu Administrativu no Munisipiu Baucau.
Estrada iha mota Baçar-Uai kotu nia luan kuaze metru 4 no naruk metru 2, estrada refere fó asesu komunidade aldeia Baçar-Uai no Uaiboro suku Hae-Coni, suku Osso-Huna, Afaloicai inklui Postu Administrativu Uatucabau Munisipiu Viqueque.
Ekipa Kobertura : RCLM
