RCLM Baucau (03/06/2026)—Estrada husi Mumana suku Abafala Postu Administrativu Quelicai liga suku Nahareca, Postu Administrativu Osso Munisipiu Viqueque balun hetan estragus, kauza husi udan bo’ot akontese iha fulan maiu foin lalais ne’e.
Xefe Suku Lelalai Salomão Fraga Fernandes informa, relasiona udan boot foin lalais ne’e afeta mos infraestrutura estrada área Postu Administrativu Quelicai ba Postu Ossu balun hetan estragus, tamba rai halai no monu, situasaun ne’e implika movimentu komunidade ho transporte publiku no privadu tamba bele mosu asidente.
Lideransa komunitariu ne’e rekomenda ba Ministeriu Obras Publika halo monitorizasaun no levantamentu ba estrada ne’ebé estagus, bele halo manutensaun.
“Husi Quelicai mai Laisorulai estrada monu no alkatraun aat, ami hare parese kualidade estrada ne’e ladun di’ak udan habsok alkatraun barak nakfera, situasaun sira ne’e fó risku ba pasajeiru no motorista sira nia vida bainhira halai lakontrolu fatin risku sira bele hatan dezastre, tamba ne’e ami husu governu tau atensaun buka meius tempu besik halo levantamentu hodi hadia fila-fali,” Xefe Suku Lelalai husu.
Iha sorin seluk Administrador Postu Administrativo Quelicai Paulo Jacinto Moreira afirma, kondisaun estrada ne’ebe mak nakfera no monu Governu liu husi Ministeriu Obras Publika la halo intervensaun lalais posibilidade sei kotu totál.
“Husu Ministeriu Obras Publika atende lalais ba problema ne’ebé akontese (estrada estagus) ami hato’o ona ba Prezidente Autoridade, hau hanoin enkamina ba nasionál tempu badak bele responde ho lalais,” dehan Administrador postu Quelicai.
Estrada ne’ebe mak estragus iha Mumana área Samadae, Alasawai aldeia Lawaliu suku, área Daralata suku Lacoliu, no ikus iha área suku Bualale.
Enkuantu Governu liu husi Ministeriu Obras Publika halo lansamentu fatuk dahuluk reabilitasaun estrada Mumana suku Abafala Postu Administrativu Quelicai ba Nahareca Postu Administrativu Osso distánsia kilómetru 22.7, iha loron 9 fulan dezembru tinan 2022, ho durasaun kontratu fulan-18, projetu ne’e respomsabiliza husi kompañia Chongquin Internasional Construction (CICO), orsamentu ne’ebe preve ba estrada Mumana suku Abafala Postu Administrativu Quelicai ba Nahareca hamutuk miliaun 16 resin($ 16.547.661,76).
Ekipa Kobertura : RCLM
