RCLM Baucau (18/06/2026)—Foin lalais ne’e, derepente mosu erosaun fo ameasa ba estrada dirasaun Baucau ba Lautem, iha area Suku Kaibada Postu Administrativu Baucau Vila Munisipiu Baucau, posibilidade bele kotu total, hodi fo difikulta ba movimentu transporte publiku no privadu sira.
Prezidente Autoridade Munisipiu Baucau Veneranda Lemos hateten, relasiona estrada ne’ebe kotu husi parte Suku Haekoni Postu Administrativo Baguia, no ida seluk ameasa kotu iha Suku Suku Abu Postu Administrativo Matebian, inklui rua seluk iha Postu Administrativo Baucau Vila, husi area Suku Bukoli no Area suku Kaibada entre suku Buruma, parte Autoridade Munisipiu Baucau preukupa tebes, maibe kbi’it la to’o, iha ne’ebe relata ona kondisaun estrada sira ba iha Governu sentral liu liu ba iha Ministeriu obras Publika.
Veneranda Lemos agradese tebes ba komunidade no Autoridade Lokal sira, maske hasoru difikuldade maibe kontinua buka dalan alternativo seluk, hodi fasilita komunidade nia movimentu transporte publiku no privadu.
“Loss duni bainhira estrada sira ne’e kotu, ponte tohar difikulta tebes ba komunidade sira atu halo movimentu, kapasidade atu hatan emergensia Munisipiu nia kapasidade la to’o maibe ami esforsu an atu relata hotu ba iha nasional”. Dehan PAM Baucau ba jornalista sira iha salaun apuramentu kuarta, 17/06/2026.
Entertantu Xefe Suku Buruma Liborio dos Santos Freitas hateten, Governu presija halo intervensaun lalais ba estrada referida, hodi bele faselita movimentu transporte entre dirasaun Baucau-Lautem.
“Nu’udar Autoridade Suku husu ba governu urujentemente halo intervensaun lalais ba estrada mini irigasaun ne’e, hodi bele fasilita trasnporte sira”. Hatete Liborio
Erosaun ne’e akontese iha sesta feira kalan semana kotuk, fo impaktu ba estrada no hakotu mos irigasaun tradisional ne’ebe liga ba suku Buruma nian, inklui ameasa ba familia uma kain rua iha area referida. Tuir observasaun jornalista iha tereinu nota katak, kareta Boot tula sasan ne’ebe todan difisil atu ultrapasa tamba estrada refere grave ona.
Ekipa Kobertura : RCLM
