RCLM-Baucau (30/07/2026)—Prezidente Autoridade Munisipál (PAM) Baucau apela ba entidade hotu-hotu, atu aumenta kontrolu ba movimentu sidadaun estranjeiru ne’ebé tama mai iha Munisípiu Baucau, liu-liu grupu sira ne’ebé deskonfia bele halo atividade ilegál hanesan Scam Call Centre.
Prezidente Autoridade Munisipiu Baucau, Veneranda Eurico Lemos Martins, haktuir iha Kapital Díli, Autoridade seguransa sira kontinua halo operasaun hodi dezmantela no kaptura sidadaun estranjeiru, liu-liu ema husi Xina, ne’ebé deskonfia involve iha atividade ilegál online.
Tanba ne’e, nia apela ba Autoridade lokal, Xefe suku, entidade sivil no komunidade atu hamutuk kontrola no investiga bainhira iha movimentu grupu boot sidadaun estranjeiru iha área juridisaun Munisípiu Baucau.
“Apela ba xefe suku sira óras ne’e da-daun iha ita nia rain akontesementu loro-loron iha Díli ka’er Xinsan ne’ebé laiha responsabilidade mai ita nia rain halo Scam online buat ladi’ak mai ita nia rai, iha Baucau tau matan liu-liu grupu boot la’o iha ita nia rai xefe suku, komunidade no se de’it tenke hakbesik husu sira mai husi ne’ebé? hela iha ne’ebé no atu halo saida?,” hateten Prezidente Autoridade Baucau apela asuntu ne’e iha salaun “Soi-Mali” vila nova hafoin partisipa lansamentu livru Lalatak no Roman Pirilampu husi memoria sobrevivente pasadu.
PAM Baucaua firma, iha tinan 2024 deklara ona lasimu sidadaun estrajeiru Xina halo atividade negósiu iha munisipiu, tanba Baucau oan iha kapasidade halo negosiu ho kualidade kompara ho sidadaun estrajeiru.
“Tanba ne’e ita lakohi sira tama, la’os dehan tanba ita lagosta, ita membru ASEAN maibe ita tenke seguransa ba ita nia rain,” deklara,Veneranda.
Enkuantu, jogu ilísitiu (Scam Call Centre) atu labele akontese iha Munisipiu Baucau, sidadaun hotu tenke matan-moris no servisu hamutuk ho autoridade sivil no military, hodi prevene atividade ilegal husi nivel Munisípiu to’o aldeia, no garante ambiente seguransa ba komunidade.
Ekipa kobertura : RCLM
