RCLM Baucau (23/04/2026)—Diresaun Munisipal Transporte Komunikasaun (DMTK) Baucau, rekolla reseitas ba kofre estadu hamutuk $ 85,281.00 durante primeiru trimester, hahú fulan Janeru to’o Fevereiru tinan 2026.
Diretor DMTK Baucau Mariano Pinto da Costa realata, reseita hirak ne’e rekolla husi fulan tolu husi atividade inspeksaun ho montante $ 49,100.00, tranjektu públiku $ 11,475,00, karta kondusaun ho montante $ 14,885.00 no rejistu ho montante $ 9,821.00.
Mariano informa, atendementu DMTK Baucau husi segunda to’o sesta no kada loron atende kliente minimu ema na’ain lima nolu no masimu atus ida.
“Agora dadauk ita nia polisia mos halo cek poin badinas, entaun DMTK Baucau mai aumenta ba bei-beik,” dehan Mariano iha nia kna’ar fatin vila nova kinta ne’e.
Diretor DMTK Baucau dehan, difikuldade sira infrenta menus fasilidade servisu hanesan makina karta kondusaun, printer, no menus rekursu umanus, tamba ne’e hato ona pedidu ba Diresaun Nasional Ministeriu Transporte Komunikasaun maibe seidauk responde.
“Relasiona difikuldade, ita hato’o proposta ba Ministeriu no enkontru mos ita hato’o, agora dadauk parte Ministeriu esforsu hela oinsá bele responde ita nia preokupasaun iha tempu badak, nune’e halo atendementu di’ak no lalais ba kliente sira,” Mariano tenik.
Entertantu, rekursu umanus iha DMTK Baucau hamutuk 13, mai husi departamentu inspeksaun, tranjektu publiku, karta kondusaun rejistrasaun.
Ekipa Kobertura : RCLM
