RCLM Baucau (11/06/2026)—Diresaun Munisipál Transporte no Komunikasaun (DMTK) Baucau, iha loron 10 fulan juñu hahú halo mudansa inspesaun taxa administrasaun foun, ba veikúlu motór no kareta inklui karta kondusaun.
Diretor Diresaun Munisipal Transporte no Komunikasaun (DMTK) Baucau Mariano Pinto da Costa hateten, taxa administrasaun foun ba veikúlu ka transporte motor no kareta no karta kondusaun, bázea ba dekretu lei númeru 17/2026 loron fulan maiu 2026 kona-ba ‘taxa dividas por atos e servicos da administração pública relativos Veiculos a Motor’ Prezidente Republika dekreta no públika ona jornál da Republika to’o ona loron 30, tamba ne’e Diresaun Munisipál Transporte no Komunikasaun (DMTK) Baucau hahú implementa.
“Ami komesa implementa horseik (10-6-2026), ita nia kliente sira balun mai kestiona, maibe balun kumpri sira selu ona iha banku kareta no motór hamutuk 40 itál ona,” haktuir Diretor DMTK Baucau ba RCLM iha nia kna’ar fatin vila Nova kinta ne’e.
Nia esplika, taxa administrasaun ba transporte foun atuál implementa diferente, tamba anterior halo inspesaun transporte motor selu ho montante $ 10.00, maibe liu loron válidu multa $ 5.00 nune’e hamutuk $ 15.00, maibe dekretu lei foun halo inspesaun motór selu taxa administrasaun $ 14.00, enkuantu liu loron válidu sei selu dobru dala-tolu ho totál $ 42.00.
Diretór DMTK Baucau akresenta, kareta ki’ik antes ne’e, halo inspesaun selu taxa $ 20.00 no liu loron válidu selu $ 30.00, dadaun ne’e selu $ 21.00 bainhira liu data válidu selu dala-tolu ho totál $ 63.00, kareta bo’ot antes ne’e halo inspesaun selu taxa $ 15,00 liu data válidu selu $ 25,00 atuál selu $ 28,00, liu data válidu selu dala-tolu ho totál $ 84.00.
“Depois sira sei selu tan taxa sirkulasaun annual (tinan 1) kareta no motór privadu no publiku sira, foin implementa taxa ida ne’e, antes ne’e seidauk iha maibe agora dekretu lei foun taxa sirkulasaun anuál ba motór selu taxa $ 12.50 cen, kareta ki’ik selu $ 26.50 cen, truk $ 42.00. Depois ba truk sei selu tan taxa ba karga nian, ka tula sasan sei selu tan ne’ebé tinan ida selu $ 70.00,” Mariano Tenik.
Nia akresenta, kona ba karta kondusaun mos iha mudansa tamba antes ne’e halo renovasaun karta kondusaun permanente selu taxa $ 20.00 no liu data válidu la aplika multa, maibe dekretu lei foun taxa administrasaun renova karta kondusaun selu $ 28.00 bainhira liu data válidu, sei selu dala-tolu no totál $ 84.00.
Enkuantu, taxa administrasaun karta kondusaun foun motor no kareta antes ne’e selu hanesan ho montante $ 15.00, maibe dekretu lei foun atuál halo karta kondusaun kareta selu $ 24.50 no motór $ 14.00.
Ekipa Kobertura : RCLM
