RCLM Baucau (13/05/2026)—Tersa feira semana ne’e Hospital Regional Eduardu Ximenes Baucau Simu pasiente ida ho naran Eugenia Ximenes tinan neen nolu resin rua (62), husi suku Gariwai Postu administrativo Baucau Vila Munisipiu Baucau ne’ebe deskonfia suspeitu ba Kazu raiva.
Diretur Klinika HoREX Baucau Mouzinho Fransisco da Costa Belo hateten, iha loron ualu fulan março tinan 2026 asu tata pasiente ne’e iha Suku Gariwai, ne’ebe halo tratamentu iha HoREX Baucau maibe iha loron hitu fulan maio tinan ne’e, pasiente komesa dezenvolve sintomas raiva hanesan ta’uk bee Isin manas no kabun laran moras.
Mouzinho hatutan mediku espesialista sira foti ona pasiente nia amostra (sampel), hodi lori ba Hospital Nasional Guidu Valedadere atu halo teste iha laboratorium.
“Tuir kronologia dia 8 fulan março ne’e mak asu tata iha ne’eba, lori duni mai hospital mai fase no halo tratamentu maibe komesa dia 7 fulan maio komesa dezenvolve sintomas hanesan hidrofobia ou hare bee tauk, tamba ida ne’e mak ami deskonfia suspeitu hela ba ravies, ami nia doutor parte vizilansia nian ohin lori ona ba Dili ita hare rejultadu, maibe dadaun ne’e pasiente kondiasaun keral diak hela ne’ebe sei halo hela tratamentu iha Hospital “. Dehan Diretur Klinika HoREX Baucau ba jornalista sira iha nia Kna’ar fatin quarta, 13/05/2026
Diretur klinika ne’e husu ba sidadaun hotu, bainhira asu tata lalais ba faselidade saude ne’ebe besik, hodi halo tratamentu atu nune’e halo prevensaun.
“Atu rekomenda ba komunidade katak importante animal sira iha uma hanesan asu, busa no lekirauk tenke vasina no asu tata ona karik lori lalais ba sentru saude, primeiru tenke fase mos iha fatin ho bee suli no tenke lori ba sentru saude ne’ebe besik, para halo vasina ba moras ne’e so ita halo prevene deit kuandu hetan ita labele halo buat ida”. Hateten Mouzinho
Tuir dadaus ne’ebe jornalista asesu katak, kazu asu pozetivo raiva hamutuk sanolu resin lima ona iha Postu Administrativo Baucau Vila kompostu husi suku neen hanesan suku Gariwai, Bahu, wailii, Seiçal, Tirilolo, Builai no Postu Administrativo Vemasse iha Suku Vamasse Tasi.
Ekipa Kobertura : RCLM
