RCLM Baucau (23/06/2026)—Autoridade suku Buruma no Akademista husu Ministeriu Turizmu no Ambiente, atu dezenvolve seitor turizmu iha Munisipiu Baucau, hodi bele dada vizitante sira husi rai liur, Nasional no Lokal sira, hodi visita nune’e komunidade sira ne’ebe besik bele hetan netik rendimentu loron-loron.
Xefe suku Buruma Liborio dos Santos Freitas hateten, kada tinan governu aloka orsamentu jeral estadu ba Ministeriu Turizmu no Ambiente atu hadia fatin turizmu sira, maibe iha Munisipiu Baucau fatin turizmu maioria abandonadu.
Xefe Suku rekomenda ba Governu liu liu Ministeriu Turizmu no Ambiente, atu hadia infraestrutura bazika iha area turizmu nune’e bele atrai turista sira bele vizita.
“Hau rekomenda ba Governu atu investe hodi dezenvolve infraestrutura bazika iha area turzimu, nune’e vizitante sira husi Nasional, Lokal no estranjeirus sira bele fo hela reseitas balun iha Munisipiu Baucau”. Dehan Xefe suku Buruma ba jornalista sira iha Uma Dame Watulete foin lalais ne’e.
Akademista Grigorio Menezes dezafia politika Ministru Turizmu no Ambiente, ne’ebe trasa ona hodi kria kondisoens ba fatin turizmuhanesan Watabo’o no Foho Matebian, atu nune’e bele dada turista sira mai iha Munisipiu Baucau.
“Hau nu’udar akademista husu MTA mak ne’e planu oinsa para bele hadia fatin turizmu hanesan watabo’o no foho Matebian, atu nunee bele dada turista sira husi rai liur, Nasional to’o mai iha lokal”. Hateten Grigorio.
Hatan ba preokupasaun ne’e, Diretur Jeral Turizmu Antonio da Silva hateten parte ekipa husi Ministeriu Turzimu halo ona dentifikasaun ba setor turizmu sira ne’ebe lokaliza iha Munisipiu Baucau, hodi tau ona ba planu maibe Ministeriu Turizmu sei investe uluk ba turzimu sira ne’ebe konsidera potensial.
“Turizmu sira ne’ebe iha Baucau ami tau ona ba planu depois de halo tiha identifikasaun, maibe ami sei investe uluk ba turizmu sira ne’ebe potensial liu, hodi atrai vizitante sira”. Dehan Antonio
Seitor Turizmu ne’ebe eziste iha Munisipiu Baucau mak hanesan turizmu komunitariu, relijiozu, fatin istoriku, kultural, eko turizmu no seluk tan.
Ekipa Kobertura : RCLM
