RCLM Baucau (18/05/2026)—Autoridade Postu Administrativu Baucau vila Munisipiu Baucau planeia, hakarak dezenvolve foku bá setór agrikultura liu-liu natar sira ne’ebé abandona, maibe laiha irigasaun.
Administradór Postu Administrativu Baucau vila, Aires de Fátima Correia hateten, Postu Baucau vila suku tolu hanesan Caibada, Bahu no Bucoli seidauk iha mini irigasaun, tamba ne’e Autoridade Postu Baucau vila submete ona proposta ba Ministeriu Agrikultura Pekuaria Peskas no Florestas, liu husi Diresaun Servisu Munisipal Agrikultura, maibe seida’uk fo respota tamba ne’e nafatin husu atu aprova proposta hodi halo mini irigasaun.
“Ita espera proposta aprezenta ba Ministeriu Agrikultura Ministru bele aprova, atu nune’e ita nia natar iha Postu Baucau vila bele moris hotu fó rendimentu aas ita bele hamenus fos husi rai li’ur mai,” dehan Administradór Postu Baucau vila iha nia kna’ar vila Antiga.
Iha sorin seluk, xefe suku Caibada Cosme da Costa Lopes preokupa, natar area Suku Caibada komunidade agrikultór abandona kuaze tinan sia, tamba laiha irigasaun hodi fornese bee.
“Dalabarak ita aprezenta ba Extensionista no Agrikultura Munisipiu ita falta mak irigasaun, tamba ne’e ami autoridade ejize nesesidade povu nian, se ita hakarak han ita nia hahan fós rasik, maibe ita nia kondisoens irigasaun laiha la responde,” Xefe suku Caibada Preokupa.
Liga ho preokupasaun ne’e RCLM seida’uk halo konfirmasaun Diretór Servisu Munisipál Agrikultura Baucau tamba laiha fatin.
Enkuantu bazeia ba dadus husi Autoridade Baucau vila natar liu-liu suku Bahu seida’uk funsiona hamutuk ekatares 120, suku Bucoli hektares 221 Caibada (uamua) 30, tamba seidauk konstrui mini irigasaun hodi fornese bee ba natar.
Ekipa Kobertura : RCLM
