RCLM-Baucau (14/05/2026)–Mini Ponte antigu área Tali-isi suku Samalari kotu total kauza korenti mota, relasiona udan boot ne’ebé akontese durante loron lima foin lalais ne’e iha Postu Admimistrativu Baguia Munisipiu Baucau.
Administrador Postu Administrativu Baguia Mario Xavier da Silva esplika, relasiona mini ponte antigu mota Tali-isi Samalari kotu foin lalais ne’e, nia parte halo ona kordenasaun, kompaña internasionál NORINCO ne’ebé resposabioliza projetu estrada Laga-Baguia, atu halo normalizasaun liu husi monta manila, bainhira udan para no debitu bee menus.
”Kompaña NORINCO atu halo normalizasaun monta fali manila ba ponte refere (Tali-isi), maibe kondisaun iklima udan nafatin, bee debitu sei boot entaun sira seida’uk halo normalizasaun,” informa Administradór Baguia ba RCLM liu husi via telefone kinta ne’e.
Mario haktuir, estrada Laga ba Postu Administrativu Baguia kotu iha ponte Tali-isi, difikulta tebes movimentu komunidade ho transporte lori produtu lokál asesu merkadu Munisipal no Nasionál.
Antes ponte ne’e seida’uk hetan estagus husi korenti mota, kompaña internsional NORINCO halo dalan alternativa parte ponte kraik, maibe akontese udan boot korenti makas movimentu transporte labele ultrapasa.
“Estrada diresaun Laga mai Baguia ponte ki’ik Tali-isi suku Samalari estragus husi korenti mota, entaun sobu ponte kikoan refere no fó impkatu ba movimentu transporte publiku, meius transporte publiku horseik halo husi Baguia vila mai to’o ponte kiik Tali-isi, no liu mota Dalasa Samalari hafoin sa’e fali transporte seluk ba Baucau,” hateten Administradór Baguia.
Enkuantu mini ponte antigu Tali-isi ne’ebé dadaun ne’e estragus ka kotu durante ne’e, fó asesu movimentu komunidade suku Alaua-Leten, Alaua-kraik, Larisula, Hae-coni, Osso-huna Afaloicai, inklui Postu Administrativu Uatucarabau.
Ekipa Kobertura : RCLM
