RCLM Baucau (28/04/2026)—Autoridade Munisipál Baucau (AMB), rekomenda ba Governu sentrál liu-liu Ministériu Saúde presiza tau atensaun másimu ba fasilidade infraestrutura iha óspital rejionál Eduardu Ximenes (HoREX), no apoiu ekipamentus médiku ba Sentru Saúde no Postu Saúde.
Prezidente Autoridade Munisipiu Baucau Veneranda Eurico Lemos Martins rekomenda asuntu ne’e iha enseramentu kampaña moris saudavél, ne’ebé realiza sábadu semana kotuk, iha aldeia Saebere suku Guruça Postu Administrativu Quelicai Antigu, husi programa Ministériu Kordenadór Asuntu Sosiais no Gabinete Vise Primeiru Ministru Asuntu Sosiais ne’ebé kopera servisu ho Asosiasaun Médiku Timor-Leste (AMTL).
Prezidente Autoridade Munisipal Baucau deklara, bainhira governu sentral hadi’a fasilidade infraestrutura Óspital Rejionál Eduardu Ximenes sei la transfere pasiénte iha Rejiaun Leste ba halo tratamentu saúde iha Óspital Nasionál Guidu Valadares Díli no óspital internasionál sira, tamba ne’e governu sentrál tau orsamentu hodi hadi’a infraestrutura óspitál, alende ne’e komplea ekipamentus mediku sira iha Sentru Saúde no Postu Saúde, hodi fó asistensia saúde ba komunidade ne’ebe moras.
“Bainhira infraestrutura di’ak saida mak ita hakarak ita bele alkansa, rai liur mos ita lapresiza ba, se ita iha osan hadi’a ita nia Óspital Rejionál, Sentru Saúde, Postu Saúde sira ita kompleta ekipamentus medikus sira tamba ne’e ami iha foho hein hela maibe tenke had’ia infraestrutura sira,” hateten Veneranda.
Hatan ba kestaun ne’e Vise Primeiru Ministru, Ministru Kordenadór Asuntu Sosiais no Ministeriu Dezenvolvimentu Rurál Habitasaun Komunitariu, Mariano Assanami Sabino hateten, governu sentrál nafatin identifika problema infraestrutura Óspitál Rejional, inklui Sentru Saúde no Postu Saúde iha baze hodi hato’o ba Ministériu Saúde rezolve fazeadamente.
“Ita mos identifika problema sira ne’ebé iha hodi fó ba Ministériu relevante, la’os Ministériu ida ne’e (Ministériu Kordenadór Asuntu Sosiais no Gabinete Vise Primeiru Ministru Asuntu Sosiais) mak rezolve kedas iha Ministériu Saúde,” dehan Mariano.
Enkuantu Munisipiu Baucau iha óspitál rejionál ida, sentru saúde sia no Postu Saúde rua nolu resin sia iha Postu Administrativu ualu, hanesan Postu Administrativu Baucau vila, Baguia, Laga, Matebian, Quelicai Antigu, Quelicai, Venilale no Vemasse.
Ekipa Kobertura : RCLM
