RCLM Baucau (02/06/2026)—Autoridade Munisipál Baucau (AMB) liu hosi komisaun organizador hamutuk entidades sira seluk, diskute ajenda preparasaun atividade hodi priense ba komemorasaun loron Mundiál Ambiente ne’ebé kada tinan selebra iha 06 Juñu no loron Oseánia iha 08 Juñu.
Prezidente Komisaun Organizadóra Maria Celestina Vegas hateten, relasiona Loron Mundiál Ambiente Oseánia tinan ne’e (2026), komesa ho atividade limpeza jerál iha loron 29 fulan maiu liu ba no sei kontinua realiza atividade feira produtu lokál, kuda ai-oan inklui animasaun desportu voleibol praia entre instituisaun governu, ne’ebé sei hala’o iha tasi ibun Uatu-Oli aldeia Uaniuma suku Caibada Postu Administrativu Baucau vila.
Sekretária Autoridade Munisipál Baucau Asuntu Sosiais no Organizasaun afirma, selebrasaun loron Mundiál Ambiente no Oseánia ho intensaun atu fó hanoin sosiedade kuida nafatin Ambiente área koseteira no rikusoin, tamba ne’e entidades hotu, presiza halo servisu liña kordenasun di’ak hodi fó susesu komemorasaun Loron Mundiál Ambiente no Oseánia tinan 2026 ho susesu iha Baucau.
“Ohin Autoridade Munisipál Baucau liu husi komisaun organizador realiza enkontru ho entidades sira atu ko’alia kona-ba preparasaun atu komemora loron Oseánia nian no loron ambiente oinsá ita hamos ita nia tasi ka kosteira, tamba fo’er sira ita soe arbiru udan monu rai lori mota to’o tasi, ita presiza hamos atu fó benefisiu ba jerasaun sira liu liu ai-han tasi sira nian,” dehan Prezidente Komisaun Organizadór ba Jornalista sira iha Administrasaun Munisípál Baucau tersa ne’e.
Pontu Fokál Ambiente Munisípiu Baucau Januario Pereira informa, prepara ona ai-oan tipu tolu hamutuk atus tolu, hodi kuda iha área koseteira Uatu-Oli hodi komemora loron Ambiente no Oseánia.
“Hosi parte Servisu Turizmu no ambiente, Floresta no Peskas ita prepara ona ai-oan tipu tolu hanesan ai- ketapang, ai-kasi no ai-saplong, ne’ebé tuir planu sei kuda iha área Uatu-Oli suku Caibada nian, ai-oan primeira liña ai-ketapang, segundu ai-saplong no terseira ai-kasi. Ai-kasi parte estatika kapas bainhira moris no boot, ai ketapang no saplong fó sombra ba ita nia komunidade sira ba vizita tasi ibun Uatu-Oli, parte ida mos satan anin tasi no satan abrasaun área tasi ibun, esplika Pontu Fokál Ambiente Munisípiu Baucau.
Iha sorin seluk xefe Suku Caibada Cosme da Costa Lopes konsidera loron Mundiál no Oseánia selebra iha área tasi ibun Uatu-Oli Caibada, sei informa komunidade hola parte iha atividade feira produtu lokál hodi hetan rendimentu hodi sustenta nesesidade familia.
“Tinan kotuk iha feira produtu lokál Komunidade sira lori nú laloir, fehuk, batar tunu, kumbili hahán lokál sira ne’e, maibé agora iha tara bandu nú labele ku ita bele promove produtu lokál sira seluk,” haktuir Xefe Suku Caibada.
Enkuantu hola parte iha enkontru preparasaun atividade hodi komemora loron Mundiál Ambiente no Oseánia iha Baucau kompostu husi Prezidente Konsellu Munisípál Kombatente Libertasaun Nasionál Baucau, Segundu Komandante PNTL, reprezentante F-FDTL, Prezidente Feto Mulleres ho estrutura, Administrador Postu Administrativu sira, inklui Diretór no xefe departamentu husi servisu Munisípal no delegasaun territóriál.
Ekipa Kobertura : RCLM
