RCLM Baucau (19-11-2025)—Autoridade Munisípál Baucau (AMB) liu husi Departamentu aprovizionamentu rejista empreza lokál hamutuk 67 submete dokumentus pre-kualifikasaun Munisipál, ba projetu Planu Dezenvolvimentu Integradu Munisípál tinan 2026.
Diretór servisu Munisípál Aprovizionamentu Baucau Filipe da Conseição Belo relata, empreza sosa dokumentus pre-kualifikasaun hamutuk 79 maibe husi númeru ne’e 67 maka submete hikas dokumentus, enkuantu empreza 12 la submete hikas.
Nia hateten, tuir planu fulan ne’e ekipa juri finaliza ona avaliasaun ba dokumentus no anunsia rezultadu finál ba empreza ne’ebé liu kriteriu bele kompete prosesu tenderizasaun Projeitu Planu Dezenvolvimentu Integradu Munisípál tinan oin.
Diretór servisu Munisípál Aprovizionamentu Baucau akresenta, rezultadu avaliasaun administrativa sei anunsia iha fulan dezembru tinan ida ne’e.
”Lolos ohin loke dokumentus ekipa juri halo servisu avaliasaun dokumentus administrativa maibe fulan novembru liga ba aktividade loron nasional entaun hato’o ba empreza sira tolera hein to’o fulan dezembru ami fó sai rezultadu pre-kualifikasaun nian, tamba anu fiscal 2026 sira tenke kompete tenderizaun tamba ne’e tarde liu dezembru nia laran,” Filipe informa ba Jornalista iha salaun enkontru Administrasaun Munisipal.
Diretor kompaña Zefmarla limitada Cesário da Piedade Ximenes hateten, nia parte sumbete dokumentus pre-kualifikasaun iha autoridade Munisipál tuir rekezitus, tamba ne’e husu ekipa juri halo avaliasaun tenke ho tranparansia.
”Hau konfia hau nia an liu tamba priense rekejitu pre-kualifikasaun maibe lia menon ba tim evaluasaun munisipiu labele hare ba partidu no família hare ba ita Baucau oan hamutuk dezenvolve ita nia rai ho onestu labele odiu vigansa,” Nia rekomenda.
Vise Prezidente CCI-TL Munisipiu Baucau Vasco Baptista de Oliveira, konsidera prosesu pre-kualifiksaun importante tebes tamba avalia empreza ne’ebé iha kapasidade hafoin bele halo projeitu munisipal.
”Pre-kualifikasaun importante tebes iha parte munisipál nia, tamba impreza ne’ebé priense rekezitu pre-kualifikasi nia iha direitu atu tuir projeitu ne’ebé loke iha munisipiu rasik,” dehan Vise Prezidente CCI-TL iha Baucau.
Entertantu projetu programa dezenvolvimentu Integradu Munisípál (PDIM) Baucau, tinan fiskál 2026 hamutuk 20 resin, ne’ebé prioriza ba infrastrutura báziku hanesan setór agrikultura, kanalizasaun bee-moos, no Edukasaun.
Ekipa Kobertura: RCLM
