RCLM Baucau (18-11-2025)—Ministeriu Edukasaun liu husi Departamentu Pre-eskolár no Ensiñu Rekorente hamutuk parseiru Internasionál MARY MACKKILLOP Today faselita formasaun kona-bá teknolójia aplikativu “Hanorin Aprende” (HAAP) ba manorin, inspetór no inspetora Pre-eskolár iha Rejiaun Leste hanesan munisípiu Lautém, Viqueque no Baucau.
Diretór Jerál Pre-eskolar Ensiñu Rekorente Ministériu Edukasaun Apolinario Serparoza hateten, formasaun rejionál ne’e introdúz edukasaun teknolójia HAAP ba manorin no inspetóres pre-eskolár iha abilidade, hodi utiliza iha prosesu aprendisazem kada eskola.
”Formasaun ne’e ba manorin Pre-eskolár edukasaun teknolójia ba prosesu aprendisazem tamba ita introdúz aplikasaun HAAP, oinsá manorin sira utiliza fasilidade android no manorin sira tenke iha abilidade iha prosesu aprendisazem, tamba iha aplikasun instala ona metodolojia ensiñu aprendisazem ba labarik sira kona-ba literásia, numerasia,” esplika Apolinario iha Salaun EBC Vila Nova.
Jerente MERRY MACKKILLOP Today Agostinha Ximenes hateten, organizasaun internasionál MERRY MACKKILLOP Today komitmentu forte apoiu Ministériu Edukasaun hodi espanda programa teknolójia aplikativu HAAP ba Pre-eskolár, iha territóriu nasionál inklui primeiru síklu ensiñu báziku.
”Sei dezenvolve aplikasun ba ensiñu báziku ne’e planu MERRY MACKKILLOP Today nafatin suporta Ministériu Edukasaun tamba, labarik sira aprende ona aplikasun iha edukasaun Pre-eskolár depois ba klase 1,2,3 aplikasaun ne’e laiha, entaun desmotiva labarik sira lakohi ba eskola,” dehan Agostinha.
Manorin Pre-eskolár Bercoli Postu Administrativu Venilale Bernardina Freitas konsidera formasaun aplikasaun HAAP importante ba sira atu implementa iha kada eskola ne’ebé hakna’ar an ba.
”Ami hamutuk ho kriansas sira Pre-eskolár hakerek ho manuál agora mak atu aplika dijitál ne’ebé hau kontente bainhira remata ami implementa fila-fali eskola hodi transmite ba labarik, inklui inan-aman sira” hateten Manorin Pre-eskolár Bercoli.
Entertantu formasaun rejionál kona-bá aplikativu “HAAP” iha Munisípiu Baucau durante loron lima hahú segunda to’o sesta semana ne’e no partisipante tarjetu ba Munisípiu Baucau manorin Pre-eskolár na’in-2, inspetór Pre-eskolár na’in-2, pontu vokál DNEPE na’in-1, husi Munisípiu Lautém manorin Pre-eskolár na’in-2, inspetór Pre-eskolár na’in-1 no Munisípiu Viqueque manorin Pre-eskolár na’in-1 no inspetór Pre-eskolár na’in-1.
Ekipa Kobertura : RCLM
