RCLM Baucau (17-11-2025)—Juventude iha sentru Uai-Aca Mulia husi Postu Administrativu Quelicai Antigu Munisípiu Baucau, realiza jogu komunitáriu modalidade football-11 Kopa rotativa tinan 2025, hodi festeza selebrasaun natál no tinan foun 2026.
Prezidente Komisaun Organizadór Timotio da Conseição Gaio esplika, jogu komunitáriu ne’e atu kria lasu amizade entre juventude kada bairu no anima komunidade sira moris ambiente paz no estabilidade, alende ne’e halo selesaun jogador di’ak atu reforsa football klub Mulia hodi kompete iha nasionál.
“Objetivu husi jogu ne’e atu lasu amizade entre bairu atu festeza natal no tinan foun aumezmu tempu halo selesaun jogador ba FC Mulia, hodi kompete terseira divisaun iha nasionál,” dehan Prezidente Komisaun organizadór tasa Rotativu Sentru Uai-Aca Mulia.
Reprezentante Autoridade Munisipiu Baucau Paulino Sarmento Pinto, apresia juventude sira nia inisiativa organiza jogu komunitáriu kopa sentru Uai-Aca Mulia, maibe husu komisaun organizadór no autoridade lokál asegura nune’e la’o ho susesu to’o remata.
“Eventu kopa Uai-Aca Mulia ne’e autoridade lokál, komisaun organizadór no komunidade asegura hahú to’o remata iha rezultadu,” Reprezentante Autoridade Munisipiu Baucau fó mensazem.
Komunidade Joaquim Moreira dos Reis sente kontente no apoi másimu ba jogu komunitáriu ne’e, tamba anima sira no prepara jogador profisionál.
“Ami inan-aman suporta oan sira la’ós atu halo violenensia maibé desportiva,” dehan reprezentante komunidade Sentru Uai-Aca Mulia.
Jogu komunitáriu kopa Rotativa sentru Uai-Aca Mulia tinan 2025 partisipa husi klube hamutuk 10 kompostu FC Lalagia A No B, FC Maklam A No B, FC Afirmasi, FC Hakma, FC Central, FC Bafer, FC Jova No FC Mekay. Total orsamentu ba jogu ne’e Hamutuk dollar amerikanu atus lima resin ne’ebé apoiu husi empreza Zel unip.lda, Fundasaun Graça de Deus, traballador Mulia oan iha Austrália, no empreza seluk tan.
Entertantu abertura jogu ne’e hola parte husi reprezentante Autoridade Munisipiu Baucau, Administradór Postu Administrativu Quelicai Antigu, Komandante Polísia Eskuadra Quelicai Antigu, Veteranus inklui komunidade.
Ekipa Kobertura : RCLM
