RCLM Baucau (17-11-2025)—Institutu Katólika Formasaun Profesores (ICFP sígla portugés) Marista Baucau, atribui sertifikadu apresiasaun bá formandu Língua Portugés nivel A1, A2 no komputadór programa excel tamba, konklui ona formasaun durante fulan tolu.
Vise Diretór Akademika ICFP Baucau Paula Fransica Maria dos Reis konsidera, formasaun Língua Portugés no komputadór importante ba formandu sira, tamba hakle’an sira nia koñesementu iha prosesu estudu no aplika iha kampu servisu.
“Kursu programa excel realiza husi formadór ICFP ba estudante ICFP Baucau, portugés ami lakobre estudante atuál maibe partisipasaun husi funsionáriu ka profesór ne’ebé destakadu eskola sira iha Baucau nu’udar alumi husi ICFP ka profesores rekrutadu bolsu kandidatu husi Ministériu Edukasaun Timor-Leste. Razaun kapasitasaun Língua Portugés ba estudante tamba, sai Língua Ofisiál no utiliza iha ensiñu prosesu aprendisazem tamba ne’e faselita profesores sira antes iha instituisaun ne’e, depois termina sira nia estudu kontinua hanorin eskola sira presiza iha koñesementu área Língua Portugés nian,” hateten Vise Diretór iha ICFP vila Antiga.
Formanda Língua Portugés iha ICFP Clauria Agapito Simões Yong, sente orgullu hola parte formasaun tamba, hetan esperiénsia no bainhira termina estudu kompete iha kampu servisu.
“Dosentes ka formadores insiativa loke formasaun Língua Portugés importante tebes ba ami estudante ho inisiativa tuir tamba, prepara rekursu ba futuru,” dehan Formanda Língua Portugés ICFP.
Entertantu ICFP Baucau tinan ne’e hetan orsamentu subvensaun públika husi Ministériu Ensiñu Superiór Siénsia no Kultura hamutuk dolár amerikanu rihun atus ida, sanulu resin sia ($119,000.00), hodi finansia ba atividade formasaun, trazes kulturais, diskursu akademiku, video akademiku, banda múzika no atividade seluk ne’ebé iha prémiu inklui sertfikadu bá manan nain sira.
Ekipa Kobertura : RCLM
