RCLM-Baucau (06/08/2026)—Autoridade Munisipál Baucau liu husi Programa Dezenvolvimentu Integradu Munisipál (PDIM) 2026, hahú implementa projeitu konstrusaun mini irigasaun bá natar hektare 50 ne’ebé abandona tinan barak iha Suku Builai, Postu Administrativu Baucau Vila.
Xefe Suku Builai Juvinal Feliciano da Costa haktuir, durante tinan barak komunidade agrikultór abandona sira nia natar área Uailalu no Ninu-ho’o tanba, kanál irigasaun tradisionál husi bee-matan Uaimorimata ne’ebé durante fornese bee hetan estragus kauza husi dezastre natural, rai halai ka erozaun. Ho problema ne’e, Konsellu Suku hato’o proposta liu husi reuniaun Asembleia Postu no Konsellu Konsultivu Munisipál, hetan aprovasaun no trasa ba Programa Dezenvolvimentu Integradu Munisipál (PDIM), atuál kompañia implementa ona projeitu konstrusaun mini irigasaun.
“Kanál irigasaun ba natar rai halai hetan estragus, entaun natar kuaze hektares 50 abandona, bainhira suku (Builai) hamrik mesak liu husi enkontru asembleia Postu Administrativu ita nia prioridade PDIM, tau mini irigasaun garsa proposta ne’e liu impreza hahú sira nia serbisu,” hateten Xefe suku Builai.
Juvinal hatutan, konstrusaun mini irigasaun ne’e bainhira remata, lideransa komunitariu suku sei organiza komunidade agrikultór sira atu reativa natar sira ne’ebé abandona hodi hasa’e produsaun ai-han lokal.
“Ita garante projeitu mini irigasaun finaliza natar sira abandona sei funsiona fila-fali tanba, preokupasaun mai husi komunidade no nia benifisiu ba fali sira, entaun kanal irigasaun ne’e finaliza hanesan autoridade komunitáriu oinsá organiza komunidade reativa masima sira nia natar atu bele responde polítika governu oinsá dezenvolve produtu lokal sira
Enjineiru Kompañia Nanoojo Zeze Unipesoál Limitada, Dario Manuel Freitas Fraga, dehan kompañia responsabiliza konstrui kanál mini irigasaun iha suku Builai ho naruk metru 900 no garante serbisu hotu sei la’o tuir dezeñu tékniku (BoQ) no finaliza tuir data kontratu ne’ebé determina.
“Ami hahú serbisu mobiliza material agora tama ona ba serbisu halo intek 1 mini kanál irigasaun nian hotu depois ba intek 2 no kontinua ba irigasaun ho kualidade no bazéia ba BoQ, ami mos esforsu serbisu atu finaliza tuir data kotratu,”hateten Enjineiru kompañia Nanoojo Unip.Lda.
Komunidade agrikultór Suku Builai José Freitas sente kontenti ho implementasaun projeitu konstrusaun mini irigasaun ba sira nia natar ne’ebé abandona tinan naruk tanba laiha ne’e.
“Ha’u senti kontenti projeitu mini irigasaun agora la’o ona tanba, iha tinan 1999 rai halai impaktu ba kanál irigasaun ami la bele halo ami nia natar to’o agora maibé kompañia mai halo ona mini irigasaun kualidade hau sujere mantein ho serbisu ne’e kuandu bee ba mosu kedas ami nia natar, ami bele halo fali natar,” dehan Agrikultor suku Builai.
Enkuantu, projetu konstrusaun mini irigasaun ne’e kompañia implementa serbisu hahú loron 2 Jullu 2026 no atuál progresu atinji o 20 % no tuir planu sei remata iha loron 31 Dezembru 2027. Orsamentu PDIM tinan fiskál 2026, alokadu ba projeitu mini irigasaun ne’e hamutuk $ 89,883.04.
Ekipa Kobertura : RCLM
