RCLM-Baucau (05/08/2026)—Implementasaun Programa Nasionál Dezenvolvimentu Suku (PNDS) regular tinan 2026 iha Suku Builai, Postu Administrativu Baucau Vila Munisípiu Baucau, prioritiza reabilitasaun estrada tipu cor betaun, atuál progresu atinji ona 60%.
Xefe Suku Builai, Juvinal Feliciano da Costa hateten, liu hosi reuniaun Konsellu Suku deside uza orsamentu PNDS halo reabilitasaun estrada tipu cor betaun husi Aldeia Alala ba Aldeia Builai ho distánsia metru 407, atu fasilita komunidade sira nia movimentu asesu merkadu no fasilidade públiku seluk, tamba antes ne’e kondisaun estrada aat difikulta ba transporte.
“Liu hosi Programa Nasionál Dezenvolvimentu suku (PNDS), atu responde duni ami nia vizaun lori dezenvolvimentu mai povu, entaun Autoridade esforsu oinsá finaliza programa ne’e atu benifisia ba komunidade,” dehan Lideransa Komunitariu iha nia kna’ar fatin sede suku Builai Kuarta ne’e.
Komunidade Aldeia Builai, Agostinho Freitas, sente kontente ho reabilitasaun estrada, tanba sei fasilita sira nia movimentu ho transporte públiku, asesu ba merkadu, no fasilidade públiku sira seluk.
“Implementasaun PNDS hadi’a estrada ami sente orgullu tanba, PNDS ajuda ona sor ami nia estrada aldeia mai to’o suku. “dehan komunidade Builai.
Orsamentu PNDS ne’ebé aloka ba Suku Builai hamutuk $ 30.000 no implementasaun durante fulan haat, hahú iha 6 Juñu 2026 to’o Outubru 2026.
Suku Builai, kompostu husi aldeia 4 hanesan aldeia Alala, Builai, Manulai no Samalakuliba, ho uma-kain hamutuk 498 no populasaun hamutuk 2.333.
Ekipa Kobertura : RCLM
