RCLM–Baucau (31/07/2026)—Hospitál Rejionál Eduardo Ximenes (HoREX) Baucau, rejista pasiente HIV-SIDA hamutuk 11 durante trimestre daruak tinan 2026.
Konsellór HIV-SIDA HoREX Baucau,Sabino de Carvalho hateten, pasiente sira ne’e detekta husi postu saúde iha Baguia, Quelicai, Baucau Vila, Vemasse,Venilale no HoREX Baucau bainhira pasiente sira halo teste ran.
Imferemeiru ne’e esplika, fator ne’ebé kontribui ba aumentu kazu HIV-SIDA tanba, komunidade balun seidauk iha koñesimentu kle’an kona-ba transmisaun no prevensaun HIV.
“Husi janeiru mai to’o jullu iha kazu HIV-SIDA 11 pesoas, balun ita deteta husi HoREX Baucau balun detekta husi sentu sáude sira iha sub-distritu, kona ba transmisaun HIV-SIDA liuhosi relasaun seksual tanba ne’e presizamente aprofunda esplikasaun ba komunidade hodi bele evita an no labele vítima ba moras (HV-SIDA),” dehan Konsellór HIV-SIDA HoREX ba RCLM Sesta ne’e iha nia kna’ar fatin.
Nia hatutan, medida prevensaun kazu HIV-SIDA pesoál saúde hamutuk ho autoridade lokál presiza kontinua halo edukasaun sivika iha suku sira, atu komunidade komprende di’ak liu kona-ba HIV-SIDA.
“Kuandu ita nia pesoál Sáude serbisu iha Munisipiu ba kordenasaun ho autoridade lokál kada suku hodi fó motivasaun no informasaun klaru kona ba moras HIV-SIDA no nia daet ba ema seluk ne’e di’ak liu tan, tanba ho dalan sira hanesan ne’e ita nia komunidade bele komprende di’ak liu tan evita an husi relasaun seksuál livre,” akresenta Sabino.
Enkuantu, medikamentu ba pasiente HIV-SIDA atuál sufisiente maibé, ai-moruk tipu ida ba labarik provizoriamente stok hotu, no HoREX halo ona pedidu ba Ministériu Saúde atu fornese fali.
Tuir dadus husi Konsellór HIV-SIDA HoREX Baucau, husi tinan 2006 to’o 2026 rejista ona pasiente HIV-SIDA hamutuk 103 husi munisípiu Baucau, Lautém, Viqueque no Manatutu, husi númeru ne’e pasiente hamutuk 37 mak lakon ona vida, tanba la halo tratamentu rutina no kosumu ai-moruk husi Ministériu saúde no prefere halo tratamentu ai-moruk tradisionál.
Ekipa Kobertura : RCLM
