RCLM Baucau (28/04/2026)—Estrada Postu Administrativu Baguia bá suku Osso-huna no Afaloicai, Domingu foin lalais ne’e kotu iha mota Baçar-uai suku Hae-coni, difikulta movimentu komunidade ho transporte liu-liu kareta tamba labele ultrapasa.
Rezidente Aldeia Baçar-Uai Hipólito Julião Pereira hateten, infraestrutura estrada iha mota Bacar-Uai hetan estragus ka kotu, kauza husi korenti mota bo’ot, husi udan bo’ot kuaze semana ida.
Nia afirma, alternativu komunidade área refere foti halo ponte tradisionál ho au nune’e faselita estudante sira ultra pasa ba eskola iha suku Osso-Huna no suku Hae-coni, hodi partisipa prosesu aprendisazem bainhira korenti mota bo’ot.
“Relasiona dalan iha mota Basar-uai kotu tamba udan bo’ot mai durante semana ida ho balun ona, agora dadaun kareta sira labele liu motor sira bele liu, komunidade no estudante sira difisil ultrapasa bainhira korenti mota boot, alternativa komunidade foti halo ponte lokák iha tinan kotuk halo agora dadauk sei iha estudante no komunidade ultrapasa ponte ne’e,” informa Komunidade Hae-Coni liu husi Via Telfone ba RCLM-Baucau tersa ne’e.
Iha sorin seluk, Xefe Suku Osso-Huna Paulo dos Reis Piedade akresenta, estrada iha mota Baçar-uai kotu kuze metro tolu resin, no dadaun ne’e kareta labele ultrapasa, komunidade liu-liu susu Osso-huna no Afaloicai atu mai Munisipiu la’o ain ho distánsia kilómetru rua to’o lima, foin sa’e kareta públiku iha suku Hae-coni.
Lideransa Komunitariu ne’e, husu Ministériu Obras Publika no Institutu Gestaun Ekipamentu Apoiu Dezenvolvimentu Infrastrutura (IGEADI), urjenti halo normalizasaun ba estrada ne’ebe kotu nune’e faselita komunidade ho transporte públiku asesu tula produtu lokal komunidade sira nian fa’an iha merkadu Munisipál.
“Autoridade lokál husu MOP ou IGE bele tau matan lalais ba estrada diresaun Osso-Huna no Afaloicai nune’e movimentasaun la’o normál,” Xefe Suku Osso-Huna rekomenda.
Alende ne’e, kondisaun estrada husi Baguia vila to’o suku Afaloicai kondisaun aat grave tamba, kuak kle’an inklui fatuk barak hodi prejudika movimentu transporte motor no kareta.
“Husi Baguia vila ba dalan kotu ne’e mos grave no fó risku ba transporte kareta, inklui ho motor tamba dalan kuak kle’an tamba, udan boot bee estragas kauza kanu laiha bee atu tuir,”autoridade Komunitariu ne’e afirma.
Enkuantu, estrada referida fo asesu ba populasaun suku tolu hamutuk husi suku Hae-Coni, Osso-huna, Afaloicai inklui Postu Administrativu Uatucarabau.
Ekipa Kobertura : RCLM
