RCLM Baucau (27/04/2026)—Komunidade no Autoridade Munisipal Baucau, husu Governu sentral liu-liu Ministériu Obras Publika, halo rehabilitasaun estrada husi área Samaguia suku Tequinomata Postu Administrativu Laga ba Postu administrativu Quelicai Antigun, inklui husi suku Abafala ba sentru Qulugia suku Guruça tamba, kondisaun aat.
Komunidade Suku Guruça Juvinal Correia hateten, tempu udan susar tebes sira lori produtu lokal asesu Merkadu Munsipal no Nasional tamba estrada kondisaun nakonu taho balun, bee nalihun inklui hakur mota hodi difikulta transporte publiku tamba ne’e husu Ministeriu Obras Publika atu toma atensaun ba sira nia difikuldades dadaun hasoru.
”Estrada husi ligasaun sede suku Guruça mai aldeia haat pertense sentru Kuluguia mota tolu Kaiboru, Uaimoi no Ukamuni difikulta ami komunidade suku Guruça tempu udan komunidade labele asesu. Ami komunidade asesu husi Laga mai Samaguia to’o Postu Quelicai Antigu dalan ladi’ak tamba ne’e ami nia ejizensia hakarak dalan ne’e di’ak lori produtu lokál asesu merkadu,” dehan Juvinal iha sentru Quluguia sábado fim semana ne’e.
Prezidente Autoridade Munsipal Baucau Veneranda Eurico Lemos Martins observa, komunidade Postu Quelicai Antigu maoria kuda produtu lokal, maibe kondisaun estrada sei aat tamba ne’e rekomenda ba Vise Primeiru Ministru, Ministru Kordenadór Asuntu Sosiais no Ministeriu Dezenvolvimentu Rurál Habitasaun, Komunitariu aprezenta kondisaun estrada liga ba Postu Quelicai Antigu iha reuniaun konsellu Ministru nune’e Ministeriu Obras Publika bele konsidera.
“Ami nia estrada hanesan ne’e (kondisaun aat), ami mos hameno hela hatutan ami nia lian ba konsellu Ministru atu hadi’a tiha ami nia estrada sira ne’e,” PAM Baucau rekomenda.
Vise Primeiru Ministru, Ministru Kordenadór Asuntu Sosiais no Ministeriu Dezenvolvimentu Rurál Habitasaun Komunitariu, Mariano ASSANAMI Sabino anota, preokupasaun husi komunidade no Autoridade Munisipal hodi hato’o ba Ministeriu Obras Publika bele trasa ba planu rehabilitasaun.
“Ita hato’o ba obras publika para tau mata no hare ba ida ne’e tamba estrada mai (Quelicai Antigu) fatin rua, ida halo mak dadauk ona alkatraun maibe iha problema mota,” hateten Mariano.
Entertantu, estrada ba Postu Quelicai Antigu fo asesu komunidade husi suku Afaça, Guruça Namanei no Uaitame ho uma-kain hamutuk 2.713 no populasaun hamutuk 7.488.
Ekipa Kobertura : RCLM
Good