RCLM (24/04/2026)—Konsellu Jerál Nasionál Krúz Vermella Timor-Leste (CVTL sígla portugés), enkoraja estrutura konsellu diretiva CVTL filiál Baucau atu kumpri prinsipiu fumdamentu hitu hanesan servisu umanidade, imparsialidade, neutralidade, independensia, voluntáriadu, unidade no universialidade.
Reprezentante Konsellu Jerál CVTL Elizabet Belo hateten, atu atinji prinsipiu hitu refere estrutura eleitu konsellu diretiva CVTL filiál Baucau, presiza hala’o serbisu liña kordenasun ho partisipativu no hadi’a dejafius ne’ebé infrenta.
“Ohin Prezidente ezekutivu (sesante) aprezenta kona-ba atinjimentu, lakunas ita anota no konsidera atu bele tur hamutuk atu solusiona ka halo asaun ruma, tamba ne’e kontinua enkoraja estrutura konsellu diretiva foun CVTL filiál Baucau servisu bazéia ba prinsipiu fumdamentu hitu,” dehan Elizabet sesta ne’e hafoin partisipa asembleia jerál CVTL Filiál Baucau hodi hili estrutura Konsellu Diretivu Foun periodu tinan lima (2026-2031).
Estrutura Diretivu CVTL filiál Baucau kompostu husi Prezidente, vise Prezidente, Sekretária, Tezoreira, Delegadu Nasionál na’in-4 no Membru Konsellu Diretivu na’in-7.
Enkuantu Kruz Vermelha Timor-Leste (CVTL filiál Baucau), hanesan sosiedade nasionál ida foun iha mundu no sai hanesan “auxiliariu ba autoridade públiku no nia mandatu servisu iha kampu umanitariu nian de’it ho vizaun salva vida no hadia kualidade moris ba ema vuneravel iha Timor-Leste.
Misaun nu’udar organizasaun Nasionál ne’ebé bazeia ba rede voluntáriu, CVTL preve atu prevene ba hamenus sofrentu husi ema sira ne’ebé vuneravel liu husi prestasaun servisu umanitariu ho kualidade no responsabilidade, hadi’a sistema instituisional no baze iha komunidade, prezensa iha territóriu laran tomak ho rekursu sira ne’ebé iha fatin.
Ekipa Kobertura : RCLM
