RCLM (23/04/2026)—Diresaun Munisipal Transporte Komununikasaun (DMTK) Baucau, hasai provizoria sinais tranzitu hamutuk unidade sanolu resin lima (15) tamba, afeta ba projetu reabilitasaun no alargamentu estrada urbana ne’ebe atuál kompaña responsavel implementa.
Diretor DMTK Baucau Mariano Pinto da Costa hateten, sinais tranzitu ne’ebé afeta ba projetu reablitasaun estrada urbana parte DMTK rekolla no asegura iha edifisiu bainhira projeitu finaliza sei monta hikas ba estrada publiku ne’ebe antes tau sinais tranzitu.
“Agora dadauk sinais afeta ami rekolla hamutuk 15 tau iha ne’e (DMTK), alargamentu kontinua la’o ita sei hasai hotu, ami mos informa kompaña identifika sinais tranzitu afeta ajuda rekolla no ajuda lori mai edifisiu tamba, ami laiha transporte kareta,” dehan Mariano iha nia kna’ar fatin vila nova kinta ne’e.
Nia avalia, estrada publiku latau sinais tranzitu iha impaktu ba motirsta sira tamba bele hetan asidente, maibe Diresaun Munisipal Transporte Komunikasaun Baucau kordena ona kompañia implementador, bainhira finaliza halo valeta estrada sei monta hikas sinais tranzitu ne’ebe hasai ona.
“Dalan sira ne’e sinais laiha hotu iha impaktu ba motorista sira mosu asidente tamba ne’e foin lalais hau informa ona ba enjineru kuandu alargamentu no valeta hotu informa ami tau fali sinais tranzitu,” akresenta Diretor DMTK Baucau.
Enkuantu sinais trazitu ne’ebé afeta ba projetu estrada urbana, kompostu husi sinais bandu, sinais obrigatóriu no sinais kuidadu ka atensaun.
Ekipa Kobertura : RCLM
