RCLM Baucau (23/06/2026)—Estudante Institutu Superiór Cristal (ISC) Polo Baucau, husi Fakulade Edukasaun departamentu Ekonomia no lingua Portugés semester ida no tolu, hamutuk na’in-lima nolu resin rua (52), partisipa formasaun hodi hakle’an koiñesementu kona-ba área jestaun finanseiru.
Kordenador Departamentu Ekonomia no kontabilidade ISC Polo Baucau Hermenegildo Vital hateten, formasaun ne’e faselita hosi Austrália and New Zealand Banking Group Limited (ANZ) tamba, koperasaun servisu ISC polo Baucau komesa iha tinan 2023, hodi kontinua kapasita estudante sira hetan koiñesementu kle’an atu jere osan ba planu atividade iha sosiedade.
“Formasaun ne’e kontinuasaun akordu ne’ebe asina husi ISC Polo Baucau ho ANZ iha loron 3 Abril 2023 to’o agora 2026 formasaun dala-hat ona, no ko’alia kona-ba oinsá jere osan liu-liu estudante sira kapasita an no hariku sira nia koiñesementu, bainhira sira ba sosiedade bele jere osan tamba osan importante iha moris,” dehan Hermenegildo iha kampus ISC Polo Baucau kinta ne’e.
Koordenador Departamentu Ekonomia no kontabilidade ISC Polo Baucau enkoraja partisipante sira, aplika matéria ne’ebe hetan durante formasaun atu halo jestaun di’ak ba finanseiru iha kada família.
“Liu hosi kapasitasaun ne’ebe iha ba futuru sira iha koiñesementu no bem estar ba sira nia moris,” nia akresenta.
Estudante departamentu Edukasaun no fakuldade língua Portugés iha ISC Polo Baucau Dinda Maria Pinto sente kontente, hola parte formasaun tamba hetan esperensia futuru halo manajemntu osan ba planu atividade hodi atinji nia objetivu.
Reprezentante partisipante husu ANZ kontinua kapasita maluk estudante sira ne’ebe seidauk hetan oportunidade, hodi tuir formasaun area jestaun finaseiru nian.
“Ami sente kontente no agradese tebes, tamba hetan formasaun loron rua oinsá ami maneza osan no planu futuru hodi realiza ami nia tarjetu ka planu, ami nia rekomendasaun ba Institutu, no ANZ kontinua formasaun hanesan ba maluk estudante,” estudante ISC Polo Baucau rekomenda.
Enkuantu formasaun ne’e hala’o durante loron rua husi kuarta no ensera kinta (22-23/04/2026), no hetan akompanamentu husi responsavel departamentu Ekonomia kontabilidade inklui dosentes sira.
Ekipa Kobertura : RCLM
