RCLM Baucau (22/04/2026)—Kuarta-feira (ohin) porvolta tuku 04:15 madrugada, mosu problema rezulta sidadaun na’in rua tinan menus 25 hanesan Elias Menezes kanek iha liman los no Abel da Silva kanek ain parte los tanba hetan ta’a, iha área Nunuria aldeia Oqui-Lari Suku Afaloicai Postu Administrativu Baguia Munisipiu Baucau.
Xefe Suku Afaloicai Jermano João Baptista haktuir, problema ne’e akontese bainhira vítima na’in rua hamutuk kolega sira konsumu alkhool ( tua sabu) akua rua no halo diskusaun ikus mai hamosu ta’a.
Lideransa komunitariu ne’e afirma, nia simu informasaun no to’o kedas fatin akontesementu Nunuria, inklui informa kedas Polísia Eskuadra Baguia hamutuk ambulansia evakua vítima na’in rua ba Sentru Saúde Baguia, maibé tanba konsidera kanek grave nune’e kontinua transfere ba óspitál rejionál Eduardo Ximenes.
“Sira konsumu alkhool (tua sabu) akua rua, sira joven goza malu to’o tuku 04:00, hau rona informasaun tuku 4:28 entaun sira ta’a malu antes tuku 4:15 hanesan ne’e, rua kanek, ida ta’a ne’e halai tiha ona mak sira telfone hau ba to’o fatin akontese, sira lori tiha ida kanek ne’e nia uma tamba uma besik malu, depois hau telfone ba komadante Eskuadra Baguia sira sa’e mai ho kareta ambulansia lori vítima nain rua ba Baguia halo kurativu labele, entaun lori tiha ona ba Baucau,” dehan Xefe Suku Afaloicai liu husi Via Telfone ohin (22/04/26).
Nia la kaptura suspeitu ADS, tamba halai no subar an maibé konsellu suku indentifika ona nia paradeiru iha área juridiku Afaloicai no aprezenta ona polísia hodi halo investigasaun.
“Suspeitu iha hela área suku Afaloicai ne’ebé Xefe aldeia Oqui-Lari mak atu lori ona Eskuadra Baguia,” Jermano relata.
Entertantu informasaun ne’e públika, Rádiu Komunidade Lian Matebean seidauk halo konfirmasaun ba PNTL tamba, sei iha prosesu nia laran.
Ekipa Kobertura : RCLM
