RCLM (20-04-2026)—Prezidente Autoridade Munisipál Baucau konsidera loron 20 fulan Abríl kada tinan sai loron importante ba Baucau oan tomak, tanba loron refere mak beiala no bizavo sira funda Baucau to’o ohin loron.
Prezidente Autoridade Munisipiu Baucau Veneranda Eurico Lemos Martins esplika, loron fundasaun Baucau inisia selebra husi kámara Komérsiu Industria Timor-Leste CCI-TL, Munisipiu Baucau tamba ne’e Autoridade Munisipál iha obrigasaun no dever kontinua inisiativa di’ak ne’e, nune’e kada tinan loron 20 Abríl tenke selebra loron fundasaun Baucau.
PAM Baucau hatutan, Autoridade Munisipál iha obrigasaun kontinua selebra loron fundasaun Baucau kada tinan atu jerasaun kontinudor Baucau oan hatene istória funda Baucau husi bizavó no avó sira tamba iha unidade.
“Ami hanesan Governu lokál iha obrigasaun no dever atu kontinua buat di’ak ne’ebé mak CCI-TL Baucau hahú tiha ona, nune’e mos hanesan istória ne’ebé ke desde mai husi uluk ita sei kontinua komemora, ita nia avó, bizavó, beilasa sira iha tempu ne’ebá ho limitasoens lubuk ida maibé sira konsege hari’i Baucau ida sólidu, unidade tamba ne’e, dever Baucau oan sira nian atu kontinua sira nia mehi atu lori moris di’ak bá Baucau oan sira,” dehan PAM Veneranda ba Jornalista sira iha resintu Administrasaun Munisípál Baucau segunda ne’e.
PAM Baucau afirma, komisaun organizadora ba eventu loron fundasaun Baucau kompostu husi estrutura Autoridade Munisipál, Kámara Komérsiu Industria Baucau ho membru inklui, Asosiasaun Muller emprezariál, tamba ne’e kada tinan sempre selebra no modika atividade oin-oin.
“Tinan ida ne’e selebrasun aniversariu fundasaun Baucau nia tema O Nosso Orgulhu, A Nossa Casa hanesan Prezidente CCI-TL Baucau ko’alia, uma ne’e la’ós fatin ida ita atu hela ba fó mahon ba ita bainhira loron manas no udan, maibé uma ida ita ita ba hakbesik ita nia an atu konta ita nia futuru, terus, sakrifisiu, kontente no dejafius iha uma nia laran, tamba ne’e ita nia beiala sira hari tiha ona ita jerasaun sira kontinua de’it atu lori Baucau ba propriedade,” esplika Veneranda.
Enkuantu nia konklui, istória ne’ebé beiala sira kuda hela ba jerasaun kontinudor tenke prezerva no hametin inklui hakribit violénsia atu lori Baucau ba oin
Ekipa Kobertura : RCLM
