RCLM Baucau (19/03/2026)—Relasiona ho selebrasaun Padroeiro São José Diocese Baucau ba Dala tolu nolu, Bispu Diocese Baucau Dom Leandro Maria Alves fo ordenasaun Diakonal Antonio Franklin de Sousa sai Diakonu Permanente.
Bispu Diocese Baucau Dom Leandro Maria Alves iha nia homilia hateten, Diakonu Antonio Franklin de Sousa sai Diakonu Permanente ne’e, atu tulun Amu Bispu no Na’i Lulik sira hodi atende sakramentu Baptismu, Sakramentu Matrimoniu, fahe kominaun, Liturzia Palavra, halo Homilia no liu liu servi iha Na’i Maromak nia futar lia fuan.
Dom Leandro hatutan diakonu Antonio Franklin hatudu ba sarani sira, metin duni iha ninia Vida Vokasional tuir nia lema dehan katak ” hau mak ne’e halo tuir deit Ita nia hakarak”.
“Frater Antonio franklin hatudu mai ita oinsa maka nia moris iha ninia vokasional katak metin duni, laterde atu fila ba Maromak ou fuan la hakmatek wainhira seidauk deskansa iha Na’i Maromak”. Dehan Bispu Diocese Baucau iha Igreija katedral Diocese Baucau Quinta, 19/03/2026
Entertantu Diankonu Antonio Franklin de Sousa hateten, sente kontente tebes hili dalan ida ne’e sai diakonu permanente ho objetivo atu tau matan ba ema kiak sira.
“Sente kontente tebes hau hili dalan diakonu permanente, hau iha objetivo atu tau matan ba ema kiak sira ne’e, hau nia mehi to’o i’is kotu”. Hetete diakonu Antonio
Bispu Diocese Baucau hamutuk ho Amu Lulik inklui sarani sira, Selebra Padroeiru Diocese Baucau ba 30 iha ne’ebe tuir dadus estatestiku Amu Lulik iha Diocese Baucau hamutuk besik atus ida, no Diakonu nain lima.
Ekipa Kobertura : RCLM
