RCLM Baucau (13/03/2026)—Relasiona ho osan centavos atus rua ne’ebé polemika iha media social, iha ne’ebé Loja no Postu Abastesementu iha Munisipiu Baucau dadaun ne’e, la simu ona osan centavus atus rua (200 centavos), hahu husi loron sanolu resin rua fulan Março tinan ne’e.
Komunidade Natalino Cabral Sarmentu hateten, sente triste tebes tamba lojas no Postu Abastesementu sira la simu osan Timor nian Centavus atus rua, tamba ne’e husu ba Banku Komersiu Timor leste atu halo klarifikasaun ba osan refere.
“Hakarak Buka hatene tamba sa mak ema la simu osan dua dolar ne’e, nia valor mak la iha duni ona ga osan ita la utuliza duni ona, atu nune’e banku Centrais ou Ministeriu relevante fo sai iha media para publiku hatene katak, osan ida ne’e la utuliza ona, tamba agora ita ba loja hotu-hotu la simu ba ense mina deit ema lakohi, entaum osan ida ne’e atu utuliza ba saida nian”. Dehan Komunidade Natalino Cabral Ba jornalista sira iha Tirilolo Baucau Sesta, 13/03/2026.
Funsionariu iha Loja Cineza Furak Mini Silveiro Filipe da Costa hateten, provizoriu labele simu lai osan centavus 200, hafoin BCTL no governu publika tiha rejultadu Validasaun osan, hafoin simu fila fali.
“Ema mai hola sasan ami troka osan barak, maibe sira ba tiha depois sira rona fila fali dehan osan dua dolar ne’e sira la kohi simu, i balun mos kolia dehan banku lakohi atu simu, entaun sira trauma ho ida ne’e entaun sira lori fila fali osan dua dolar ne’e mai fali ami atu kolia fila labele mos labele, ami tenke simu nafatin entaun ida ne’e osan 2 dolar ne’e ami nafatin tau iha ne’e, i ami konfirma fali ami nia patraun osan dua dolar ne’e provizoriu ita labele simu lai, ho ida ne’e sira lori 2 dolar mai ami kolia netik ami labele simu lai, se informasaun ne’e los ona ok ami prontu nafatin simu fila fali”. Haktuir Silveiro
Entertantu Epifanio Oracio Guterres nu’udar oan husi diretur loja Gemea hateten, husu ba BCTL atu halo klarifikasaun ba Moeda centavos 200, atu nune’e publiku bele komprende.
“Hahu Horseik ami provizoriu la simu osan 2 dolar, tamba ami volta fali ba ema, ema la simu la hatene osan ne’e falsu ga asli ami mos la hatene, tamba ne’e husu ba BCTL atu halo klarifikasaun ba publiku”. Hateten Epifanio
Nunee mos Funsionariu Postu Abastasimentu Realistik Marcelino da Costa hateten, labele simu osan Centavos 200 tamba volta fali ba ema la simu.
“Primeiro ami simu tiha segundu ami fo fila fali ba maluk sira, sira lakoi simu dehan katak osan falsu ona ida ne’e be ami mos la bele simu, tamba ida ne’e dehan katak osan falsu ona, husu ba Governu atu esplika didiak ba ami, depois osan be falsu ne’e lori ba loja bot sira ne’e para ami hatene, hodi hatudu ba maluk sira ne’ebe la hatene”. Dehan Marcelino
Iha loron 5 fulan março Banco Komersiu Timor-leste alerta katak, bainhira atu simu ga pasa osan centavos ida presija tau atensaun ba regras tolu mak hanesan hare, Kaer ou Sente, no koko, tamba deskonfia osan falsu centavos atus rua, sirkula ona iha Timor Leste, alende ida ne’e, Banco sentral mos sei foti medida adekuadu, haktuir kompetensia ne’ebé lei fo, hodi asegura nafatin sirkulasaun moeda ofisial iha Timor Leste.
Ekipa Kobertura : RCLM
